26 Feb 2014

Makhanselara a kgaolo potlana ya Kanye ba kopile Khansele ya Borwa go potlakela go baakanya ditsela tse di sentsweng ke dipula tse di neleng bosheng.

Makhanselara  a buile jalo mo phuthegong ya khansele  e e simologileng beke eno. Ba boletse fa ditsela mo Kanye di sa tsamaege gotlhelele mme  ba  kopa  ba lephata la ditsela gore ba eme ka dinao ka gore dikgwebo di eme ka bontsi ka ntlha ya dikgoreletsi mo ditseleng.

Mokhanselara wa Mmatshitswane, Rre Mosimanegape Tshane o buile a sa kgwe mathe  fa ditsela tse di mo kgaolong eo di fetogile melapo, e bile metsi a setse a tsenelela batho mo  malwapeng.

Rre Tshane o boletse fa metshelakgabo e thibanye mo e bileng  e kganela metsi go elela, selo se a tlhalositseng fa  se dira matangwana mo  ditseleng. O supile fa dikoloi tse di rwalang morafe  di sa tlhole di isa bapalami sentle kwa malwapeng ka ntlha ya seemo seo.

Mo go tse dingwe, mokhanselara wa Molapowabojang Rre Nelson Letshabo o boletse fa  a tshwenngwa thata ke matlakala a a gasagasaneng le metse ya  kgaolo ya Borwa e bile go lebega badiri ba lephata le le maleba ba sa dire mo  go lekaneng.

Rre Letshabo o boletse fa matlakala a sa olelwe ka nako mo a felelang a jewa ke leruo le le gobeyang mo metseng.

O kopile khansele gore e fe lephata le le abang  diteseletso ( bye-law) dithata tse di gagametseng gore motho ope yo o bonwang a gasagasa matlakala a gagamadiwe phogwana.

O tsweletse gape a ngongorega  ka tiriso botlhaswa ya dikoloi tsa khansele tse  a tlhalositseng fa di tsamaya  gongwe le gongwe  mme di se mo tirong.

Mokhanselara wa Mafhikana Mme Gladys Lesang,  ene o ngongoregile ka ditirelo tsa Ipelegeng tse di saletseng morago.

A re go  tlisa di dirisiwa tsa Ipelegeng morago ga nako  go dira  gore ditiro  tseo di salele morago mo godimo ga moo puso e bo e  senyegelwa  ke madi ka tiego e e ntseng jalo.

Mme Lesang o ngongoregile gape ka   dipone tsa mekgwatha  tse di sa berekeng mo kgotleng ya Mafikana, a tlhalosa fa selo seo se baka borukutlhi ka jaana go abo go le lefifi.Le ene fela jaaka makhanselara a mangwe o supile matshwenyego ka  mahuti  a a mo ditseleng  segolo jang mo tseleng ya Tomela mo Kanye.

E ne yare a ntsha la gagwe ,Mme Molly Kgaodi  a amogela kago ya mmolo oora-Mongala o o tla bulwang mo Kanye kgwedi e e tlang, mme a ngongoregela  gore batlhoki bangwe ba ba thusitsweng  ka lenaneo la  nyeletso lehuma ba kabo ba abetswe dimausu mo go one gore ba iteke ba itlhotlhore lehuma.

O  tlhalositse fa ditsela tsa sekonotere di sa bereke sentle mo gare ga motse, mme a ntsha mogopolo  wa gore go dirisiwe ditena. BOKHUTLO