23 Feb 2014

Lekgotla le le tsamaisang ditlhopho la IEC le simolodisitse ikwadisetso ditlhopho ya tlaleletso ka Labotlhano, Tlhakole a tlhola malatsi a le masome mabedi  le bongwe  go fitlhelela Mopitlo a tlhola malatsi a le mabedi.

Ikwadiso tlaleletso e tla jaana morago ga kgwedi tse tharo tse go neng go ikwadisetswa ditlhopho tse di ngokileng batho ba le  478 148,  palo e eleng  kwa tlase thata ga e ba lekgotla ba  neng  ba  e ipeetse ya 1.2 million.Mogolwane mo lekgotleng le Rre Osupile Maroba o boletse mo potsolotsong gore sengwe le sengwe se malala a laotswe ka jalo  ikwadiso ya tlaleletso e tla simolola mo mafelong otlhe a ikwadiso mo lefatsheng leno lotlhe.

A re kgaolo ya botlhophi ya Sefhare /Ramokgonami, e e saleng e eteletse pele  ka dipalo tse di kwa godimo tsa batho ba ba ikwaditseng  go simolola ka Phalane a tlhola gane , jaanong  e wetse kwa maemong a boraro  ka palo ya batho ba le 11 770 ba ba ikwadisitseng,  morago ga Lerala/Maunatlala ka batho ba le 12 727 le Ngami ka palo ya 12 428.

Rre Maroba a re  dikgaolo tsa botlhophi di le lesome le boraro di kwadisitse  batho ba feta 10 000 fa tse dingwe  di kwadisitse magareng ga  5000 go ya go 9000, mme  kgaolo ya Gaborone Borwa  e di goga kwa mogatleng  ka  palo ya batho ba le  4 522, e selwa morago ke Mogoditshane  ka 5 745 le Francistown Botlhaba ka 4 915.

A re dipalo tsa mafelo a ikwadiso a a kwa ntle ga lefatshe leno di solofetswe  beke morago ga ikwadiso tlaleletso.Rre Maroba o rotloeditse  botlhe ba ba sa ikwadisang go ikwadisa mo ikwadisetsong  tlaleletso  ka gonne  motho o ka tlhopha fela  fa a ikwadisitse.  A re ka 2014 palo ya batho ba ba nang le tshwanelo ya go tlhopha e ka nna 1.4million. BOKHUTLO