23 Feb 2014

Mapodisi a motse wa Mabutsane ba tlhotlhomisa kgang e mo go yone monna mongwe a tsieditseng barui ka go ba tseela dikgomo.

Mo potsolotsong le BOPA, mookamela mapodisi a Mabutsane Superintendent Pontsho Kgotlafela o tlhalositse fa ka Seetebosigo ngwaga o o fetileng, Rre Francis Letsholo wa dingwaga tse  di masome a mararo le boferabobedi wa motse wa Malolwane mo kgaolong ya Kgatleng, a ne a tsaya dikgomo di le masome a mabedi le bobedi mo baruing  ba motse wa Khakhea ba le masome a mabedi.

Madi a dikgomo tseo a ka tshwara dikete di le masome a ferabobedi le bosupa (P87 000). Superintendent Kgotlafela o boletse fa Rre Letsholo a bonwe ke ba sepodisi bosheng morago ga go nyelela ngwaga o o fetileng a sena go kwalela barui bao ditsheke tse di neng tsa boa kwa bankeng ka go sena madi mo letloleng la gagwe.

A re mosekisiwa o ne a itshupa fa pele ga lekgotla la ga mmakaseterata kwa Jwaneng ka Labobedi beke eno, tlhakole a tlhola malatsi a le  lesome le boferabobedi,  mme o santse a tshegeditswe ke ba sepodisi fa ditlhotlhomiso tsone di tsweletse. O gakolotse barui go nna kelotlhoko mo thekong le tshekiso ya leruo la bone, go tila boferefere jo bo a tleng bo diragale mo thekisong ya leruo. BOKHUTLO