10 Feb 2013

Mogokgo wa sekole se sebotlana sa Gakgatla mo kgaolong ya Kweneng, Rre Isaac Barwabatsile, o kopile batsadi go dirisana le barutabana go tshwaraganela bana mo dithutong.

O tlhalositse seo mo potsolotsong  bosheng.

O tlhalositse fa sekole se tokafaditse maduo a lekwalo la bosupa go tswa mo go 54 per cent wa 2011 go ya kwa go 74 per cent mo ditlhatlhobong tsa ngogola.

O ne a tlhalosa gape fa a gorogile kwa Gakgatla ngogola mme go supagala tokafalo ntswa tota go sa ntse go tlhaela fela thata.

O ne a tswelela ka go tlhalosa fa kgwetlho e ba kopanang le yone e le letlhoko la motlobo wa dibuka.

O ne a tlhalosa fa sengwe se se dirang gore bana ba se ka ba dira sentle e le gore sekole se mo masimo, ka jalo fa sekole se tswa bana ba dira ditiro tse dingwe tsa masimo mme ba tlhoke nako ya go bala.

O kopile gore batsadi ba nne le seabe mo thutong ya bana gore maduo a tokafale.

Rre Barwabatsile o ne a tlhalosa fa ba dule ka mogopolo wa gore barutabana ba ikgaoganye ka bana, bogolo jang ba lekwalo la bosupa ba ba thuse mo dithutong tse di ba tshwarisang bothata. BOKHUTLO