17 Feb 2014

Bagolwane ba komiti e e okametseng botsogo jwa setshaba kwa Ghanzi  ba kopile banni ba kgotla ya Morama go tsaya boikarabelo ka botsogo jwa bone ka ba re ke jone konokono mo botshelong  jwa motho .

E rile ba bua mo phuthegong ya kgotla ka mafelo a beke, baoki go tswa kwa sepateleng se segolwane sa Ghanzi  ba supa fa kgaolwana ya Morama e le yone e amegang thata ka dipalo tsa malwetse ka go farologana.

Mongwe wa lekoko leo, Rre Unaswi Segole a re mo kgaolwaneng ya Morama dipalo tsa bolwetsi  jwa kgotlholo e tona, di kwa godimo fela thata, seemo se a reng ga se jese diwelang. 

A re kgaolo ya Ghanzi go supega e le yone e di gogang kwa pele  ka bolwetsi jwa  kgotlholo e tona  ka ngwaga le ngwaga ba gatisa dipalo tse di magareng ga 200 le 300. A re se, se a tshwenya ka gore mo dipalong tse, bontsi jwa balwetsi o fitlhela gape ba na le mogare wa HIV le bolwetsi jwa AIDS.

O rotloeditse banni ba Morama go itlhatlhobela bolwetsi jwa kgotlholo e tona, ka a re bo a alafesega. A re  bangwe ba balwetsi ba kgotlholo e tona ba loba batho ba ba nnang le bone mme a supa fa go sa siama ka ba a bo ba tsenya batho bao mo diphatseng tsa go tsenwa ke bolwetse.

Rre Segole o kopile banni  gore ba seka ba emisa go nwa dipilisi ka go rata ga bone ba sa laolelwa ke ba bongaka.A  re go dira jalo go ba tsenya mo diphatseng ka bolwetsi bo felela bo gola mo bo feletsang bo palela kalafi.

Rre Bernard Khomba  ene, o rotloeditse banni  go dira loaro lwa bo rrre,a gatelela fa loaro lo, lo  fokotsa selekanyo sa go tsenwa ke mogare wa HIV gammogo  le   malwetsi a tlhakanelo  dikobo. O tsweletse a re letlalo le la borre ke lone le oketsang mathata ka le huparela megare ka kwa teng ga lone, mme ka jalo megare e  ntsifale e bake malwetsi a tlhakanelo dikobo.

O  rotloeditse banni go rupa ka a re rre yo o rupileng o phepa  e bile o babalesegile.A re  ele ba bongaka, ba leka ka bojotlhe go fokotsa dipalo tsa malwetsi a tlhakanelo dikobo mme a tswelela ka  go golela pele ka  bontsi jwa batho ba sa tsenelele mananeo  a a itebagantseng le malwetse ao. Mme  Gaobotse Monnatlhare ene o  rotloeditse banni  go tsenelela lenaneo la  katoloso tsholo ka a re ke selo se se siameng.

A re batsadi ka bobedi ba tshwanetse  go rerisana mo go tsa katoloso tsholo go itsa kgotlhang fag are ga bone. Fa ba akgela banni ba re go ka bo go ne go  le molemo fa bodiredi jwa kokelwana ya bone  bo ne bo le teng  ,mme ba supa ba  itumelela thata go bo ba kokelo ba bone go le maleba go tla go bua le bone ka dikgang tse.

Mongwe  wa banni o supile fa a le kgatlhanong le gore bana  ba nneelwe diritibatsi tsa bolwetsi jwa AIDS ba sa itse, ka a re fa ba ka rerisiwa go ka nna motlhofo gore e re  molwetsi wa go nna jalo a tlogetse go nwa dipilisi ba itsise ba bongaka go santse go na le nako. BOKHUTLO