17 Feb 2014

Khansele ya Borwa e amogetse P301.4 m mo kabong ya madi a ngwaga  wa 2014/2015.

Modula setilo wa  komiti ya madi wa khansele eo, Rre Kagiso Mosarwane a re khansele e ne ya  ikopanya le makgotla a a  ikemetseng ka nosi go itirela madi, mme a kopa gore e tswelele ka go akanya  ka ditsela tse dingwe tse e ka tsenyang madi  ka tsone mo letloleng la yone.

Rre Moswaane a re morokotso o o bonweng mo mading a a beilweng, ke one  o tsenyeditseng khansele madi a mantsi a P5.5 million, o fetile dikatso tse di tswang kwa go hiriseng matlo tse tsone eleng  P4.5 million. A re  se sengwe se se tsenyeditseng  khansele  madi ke go abiwa ga  diteseletso ka P725.150,  go bo go latela matimela ka P610.850.

O tsweletse a re  madi a a tswang mo matimeleng a ile tlase ka gonne  go disa dikgomo tse di timetseng  go ne go tura fela thata mo nakong ya leuba le le fetileng ka jalo  ba bona go le botoka go  tshwara dikgomo di le palo potlana fela.

A re khansele e  ntshitse P38 million go baakanya  mafaratlhatlha a ditlhaeletsano. Rre Mosarwane a re se se tsayang madi a  mantsi thata mo khanseleng  ke  tlhokomelo ya babereki le tsamaiso ya khansele  ka P82.6Million, go bo go latela tsa boranyane ka P57.2 million, fa   lephata la boipelego   lone le tsaya P54.9 million

Fa a akgela mokhanselara yo o itlhophetsweng, Rre Alec Seametso, o supile matshwenyego a gore lephata la boipelego le  okelediwa madi ngwaga le ngwaga  le fa ntswa  go nale  mananeo a nyeletso lehuma.

Le fa go ntse jalo o rile o lebogela go bo dikoloto tsa  khansele  di le kwa tlase go nale mo nakong e e fetileng. O ngongoregile ka bagwebi ba ba isang ditlhwatlhwa kwa godimo fa ba rekisetsa puso.

Mokhanselara Ponatshego Tshiping wa Moshopa legare ene o gakolotse khansele go isa madi a ba neng ba ikaeletse go baakanya  ka one kwa   mananeong a nyeletso lehuma., a tlhalosa fa  lehuma  le ntse le tokafala.

Rre Patrick Ralotsia, mokhanselara wa Ntsweng Bophirima  ene o supile fa go rua dikoko tsa Setswana go sena dipoelo dipe a bo a tlatsa ka gore madi a  abetsweng go baakanya ditsela mo Kanye a mannye fela thata. BOKHUTLO