16 Feb 2014

Banni ba Khudumelapye mo kgaolong potlana ya Letlhakeng ba gakolotswe go  tsaya boikarabelo le go nna le seabe mo go fokotseng kanamo ya mogare.

Mafoko ao a builwe ke modulasetilo wa komiti ya malwantwa, Rre Mafoko Dingaka. Rre Dingaka o supile fa komiti e ikemiseditse go ruta batho ka metlhale yotlhe go tlhatlhelela banni ba motse oo ka kanamo ya mogare gotswa kwa go mmagwana goya kwa leseeng.

O supile fa komiti e dira e itebagantse le letshego la tebelopele ya setshaba la 2016 le le reng tshaba e e itekanetseng.O tlhalositse fa ba dule letsholo ba tsamaya ntlo le ntlwana go gasa molaetsa ka malwetsi a masha a dikobo segolobogolo segajaja.

E rile fa a ba ema ka lefoko modiri wa Tsholofelo Trust Mme Talelo Dinoge o ne a kgotlhatsa komiti ya malwantwa go tlhabana kgatlhanong le bolwetsi jwa segajaja jaaka leina la bone le supa ele malwantwa. O ne a supa fa a solofela  gore boleng teng jwa komiti eo botla fokotsa dipalo tsa batho ba ba tsenwang ke mogare ka mmetela kwa motseng oo.

Mme Dinoge o ne a abela komiti  eo kapari  e ba tla e aparang fa ba tsamaya ntlo le ntlwana. Bokhutlo