13 Feb 2014

Mookamela lephata la badirela puso, Rre Carter Morupisi a re molao o o amang badirela puso o tshwanetse go dirisiwa sentle, ke sone se go tserweng tshwetso ya go o sekaseka.

Rre Morupisi o buile jalo ka Mosupologo, Tlhakole a tlhola lesome le motso kwa Letlhakane a buisa badirela puso.  Rre Morupisi a re DPSM  e lemogile fa  dilo tse di tshwanang  le  madi a tlaleletso ( overtime) a fiwa le badirela puso ba maemo a a kwa godimo tota.

A re go dira jalo go turela puso ka jalo madi a, a  tshwanetse go  fiwa  babereki  ba se ba nene fela.  Rre Morupisi a re lephata le le okametseng badirela puso le bone gape gore  molao wa badirela puso le  wa pereko ga di tsamaelane. A re go tsaya karolo ga badirela puso mo dipolotiking le gone  go tshwanetse ga sedimosiwa sentle.

O tsweletse a re ba ne ba solofela fa molao oo o tlhamaletse, mme a re bosheng jaana ba  lemogile fa badirela puso ba tsaya karolo mo dipolotiking ka bangwe ba  nnile le seabe mo ditlhophong tsa peo letlhokwa tsa diphathi tsa sepolotiki.

A re  ka jalo  ba bone go tlhokafala go tlhatswa ntlha eo. O supile fa  go sa letleleleng badirela puso go tsaya karolo mo dipolotiking go sa le go nna teng le mo pusong  ya tautona wa pele wa lefatshe leno Sir Seretse Khama.

Mo dikgannyeng tse dingwe, Rre Morupisi  a re  le  ntswa puso e lebanwe ke dikgwetlho  tse di farologaneng  tse di kgoreletsang  go tsisetsa batho ditlamelo sentle, dipatlisiso di supile fa  go sa feng setshaba ditlamelo ga  badirela puso go sa dirwe ke dikgwetlho tse di tlhokanang le madi kgotsa di dirisiwa. A re go tlhoka  go tsisetsa setshaba ditlamelo go bonwe ele maduo a go sa tseyeng maikarabelo mo tirong , go tlhoka go supediwa tsela le go araba dikopo tsa setshaba.

A re bontsi jwa batho  ba ba yang kwa diofising tsa puso go kopa thuso, ke batho ba  ba sa itseng pharologanyo fagare ga maphata a puso, ka jalo go mo go bone jaaka badirela puso go supetsa setshaba seo kwa se ka bonang thuso e ba e batlang teng .

Rre Morupisi o tsweletse  a re  dipuisanyo di tsweletse ka dikgang tse di tshwanang le koketso dituelo le mabaka a pereko.

O kgothaditse bagolwane go rarabolola dikgotlhang  fagare ga badiri ka bofefo, gonne  a re go tlhoka go dira jalo go tsala gore dikgang tsa go nna jalo di felele di tsena  kwa ofising ya gagwe. A re dikgang  di tshwana le go fudisiwa  ga babereki di tlhokana  le therisano fagare ga mmereki  le mogolwane wa gagwe. A re fa gongwe mmereki o gana go  fuduga fela ka gore mogolwane ga a bega kgang sentle go le pele.

O kgothaditse  badirela puso  go ngathogana lemme la  di dirisiwa tse di teng mme a supa fa di dirisiwa jaaka dikoloi ele nngwe ya dikgwetlho tse di lebaneng puso. BOKHUTLO