13 Feb 2014

Mapodise a  Mahalapye  a tshegeditse monna  wa  dingwaga  tse  di masome a mabedi go ba thusa mo ditlhotlhomisong mabapi le go hulwa ka tlhobolo ga mosadi mongwe wa kgotla ya  Leretlwabosheng.

Mogolwane  wa  mapodise a e seng a seaparo (CID), Rre Letsweletse Baile, a  re  tiragalo eo e diragetse kgwedi eno e le boferabobedi mo  kgotleng ya Leretlwa fa batho bao, ba go bolelwang ele baratani  ba ne ba tlhoka kutlwisiano  mo  go neng  ga  dira  gore  mmelaelwa  a hule mosadi yoo ka tlhobolo ya dihala mo matsogong.

Rre Baile a re mosadi yoo wa dingwaga tse di fagare oa sidilega kwa kokelong ya Mahalapye mme a bolela fa mmelaelwa a sa ntse a tshegeditswe ke mapodise fa ditlhotlhomiso tsone  di tsweletse. A re mmelaelwa, yo le ene a tlholegang mo kgotleng  ya  Leretlwa, o ne a itshupa kwa kgotleng ya ga makaseterata ka Labobedi, go lebisiwa molato wa go leka go bolaya.

Rre Baile a re ele ba sepodise, ba tshwenngwa ke ditiragalo tse di golelang pele tsa batho ba ba gobatsang ba bangwe ka go ba hula ka ditlhobolo, jaaka tiragalo e mo go yone monna mongwe wa Radisele a neng a hula monna mongwe wa letso la Zimbabwe ka tlhobolo ngogola.

Fa dikgang di eme jalo, Rre Baile o bolela fa mapodise le morafe wa Kalamare ba le mo patlong  ya ya  monna mongwe wa  dingwaga  tse di  masome  a mabedi, yo  a saleng a timetse kgwedi e fetileng ele masome a mabedi le boferabobedi kwa merakeng ya Kokolo.

A re o kopa setshaba segolo jang ba meraka le masimo a mo tikologong ya  Kalamare go thusana le mapodise mo patlong ya monna yoo kana go begela mapodise ka bangwe ba ba ka tswang ba sa baitse mo thoteng ya bone. BOKHUTLO