05 Feb 2014

Batswana le maphata ka go farologana ba tsweletse ka go tshegetsa le go diragatsa  letshego la tebelopele ya 2016  la setshaba se se kutlwelobotlhoko e bile e kgathala.

Ba lephata la thuto ga-e-golelwe kwa kgaolong ya Letlhakeng  ba ne ba etela sekole se sebotlana sa Letlhakeng bosheng , go ya go abela bana ba le babedi kapari ya sekole le melora. E rile a rola dilwana tseo, mogolwane wa  thuto ga-e-golelwe mo kgaolong eo, Mme Gaolese Ncaagae, a tlhalosa fa ba bonye go le botoka go thusa bana bao ba basimane ka paka ya sekolo le melora ka ba lemogile fa ba tlhoka go tswa. 

Mme Ncaagae a re, go ne ga supega fa bana ba tswa mo lwapeng le le lengwe. O kaile fa ba itemogetse fa bana ba ba  thusitseng bao e se bone fela ba ba nang le botlhoki. Mme Ncaagae a re ba kgonne go rekela bana bao dilwana  tsa P1 228,  ka  bontlha bongwe jwa madi a ba neng ba ntse ba a kgobokanya  ka go dira  bo mmabontle le dikopelo.

O tlhalositse  fa  maikaelelo a bone  fa ba  kgobokanya madi  e le  go a dirisa go thusa fa go tlhokegang teng. Fa a amogela dilwana tseo, mogokgo wa sekole seo, Mme Sibongile Matshambane, o ne a kaya fa a itumelela tirisanyo mmogo ya bone le ba thuto ga-e-golelwe fa ba na le selelo. Mogokgo o ne a tlhalosa fa motsadi wa bana bao  a sa kgone go itirela ka a le bokoa mo mmeleng. Bokhutlo