03 Feb 2014

Banni ba Sexaxa mo kgaolong ya Nhabe ba lela ka lenyora e bile ba re ba setse ba tsere tshwetso ya go nwa metsi a a sa tlhatswiwang a noka ya Thamalakane.

Ba ntshitse ngongora eo mo phuthegong ya kgotla e buisiwa ke Mokhanselara  Tapoloso Mosika bosheng. Bangwe  ba bolela fa go le borai thata go ga metsi kwa nokeng ka a setse a kgoberegile, jalo ba pagama mokoro o ba reng o kile wa batla go ba digela mo nokeng, gore ba bone a a botokanyana  fa gare. Ba tsweletse ba re  go borai gape  ka noka  eo e na le dikwena le dikubu.

Ba supile gore fa e sale go tswa ga lephata la metsi go tsena  koporase ya Water utilities, seemo sa metsi mo motseng se befile.

Ba re ba ipotsa gore ka ba ise ba nwe metsi a Water Utilities, fa go twe ba a kolota tota ba tlaa bo ba duela  eng, e bile ba re ba utlwa botlhoko gore Water affairs e bo e tsamaile. Mongwe wa banni ba motse, Mme Mozingi Moagi o ne a akgolela ba  lephata la botsogo ba ba tshelang melemo mo matlong go bo ba dirisa molemo o o sa takeng lokotswana e bile o se bogale jaaka wa pele.

Mogokgo wa sekole se sebotlana sa Matlapana, Rre Ihuuraa Tjitjoo ene o boletse   fa a na le bothata le batsadi  ba ba bayang bana kwa merakeng  ba ba rontsha sebaka sa go tsena sekole ka nako. A re batsadi  ba baya bana go fitlhelela ba nna dingwaga tse di lesome le bobedi e bo e le gone ba ba tsisang sekoleng.

A re go dira jalo ke molato e bile go ka dira gore ngwana a gole a itse gore ene tiro ya gagwe ke go disa fela. O rotloeditse batsadi  go emela thuto ya bana ka dinao go na le go e diegela. O tlhalositse gape fa go na le batsadi  ba ba kgonang go nna le bana ba lofile sekole mme a supa fa  molao wa thuto o tlhalosa gore fa ngwana a sa bonale kwa sekoleng  malatsi a a masome mabedi le bongwe o tshwanetse go ntshiwa  ka go sa itsewe  kwa a teng.

A re fa ngwana a sa tsoga sentle, motsadi o tshwanetse a tsaya boikarabelo jwa go itsese barutabana gore ngwana wa go nna jalo a seka a nna le mathata a go latlhegelwa ke phatlha. Le fa go ntse jalo, Rre Tjitjoo o akgotse  batsadi  ba Sexaxa  ka go kgothatsa bana go tsena  sekole  kwa  Matlapaneng  le ntswa ba tsamaya dikhilomithara di boro babongwe go ya koo.

E ne e rile go le pele, Mokhanselara  Mosika a ba itsese ka botlalo ka tiro ya mokhanselara le tse ba di buileng mo phuthegong e e fetileng ya khansele gammogo le go tsaya megopolo go e isa kwa khanseleng e e tlang. O ne gape a ba tlhalosetsa gore e re le ntswa  ba  bonye  bangwe  ba ba neng  ba kaile fa ba ka ba thusa ka go ba agela matlo a borutelo a mabedi, khansele ga e  a amogela  thuso  eo, e bolela fa go tlhaela dilo dingwe jaaka maapeelo, matlwana a boitiketso le a boroko jwa barutabana.

A re o gakgamala thata ka jaana ene a bona gore ke mpho ya botlhokwa ka jaana bana, segolo jang ba bannye ba ne ba tlaa emisa  go tsamaya sekgele se seleele ba ya Matlapaneng. Mokhanselara o ne gape a ba itsese fa puso e tshwenyegile ka dipalo tse di golelang  pele tsa batlhoki mo lefatsheng leno, le gore ba tshwanetse go batla ditsela  tsa go di fokotsa.

O kopile batsadi go bula matlo a bone ka nako ya fa go tshelwa molemo o o bolayang monang, a re ke tsela nngwe ya go fokotsa bolwetse jwa letshoroma. BOKHUTLO