30 Jan 2014

Banni ba Tumasera, mo kgaolong ya Tswapong Borwa ba re ba tshwentswe thata ke bogodu jwa leruo jo bo ileng magoletsa mo kgaolong ya bone.

Ba ntshitse matshwenyego a mo phuthegong ya kgotla e e neng e buisiwa ke Mothusa Tona wa Temo Thuo, Rre Oreeditse Molebatsi  bosheng.

Kgosi  ya motse oo Kgosi  Kooratelo  Maleele  o tlhalositse  fa  magodu ao a  sa utswe  a tsaya  fela, mo   a  tsayang  dikgomo le marole  a tsone. A re barui  ba setse ba robala kwa masakeng   ka gore fa  ba tlogela leruo le le nosi,  magodu  ao ba tla go le tsaya.

O tsweletse a re, se se ngomolang  pelo le go feta  ke gore, magodu ao ga ba utswele go rua ba utswela go tlhaba mme ba fitlhe nama  mo dikupung  tse di tona  tsa metsi gore ba kgone go tsamaya  ka yone go sa lemosege  gore ba tsere nama.

Mongwe wa banni ba motse oo , Mme Tshokolo Maleele  o  supile fa batsadi ba kgona go roma bana ba ba dingwga tse di kwa tlase,  ba ba  sa sekeng  gore  ba utswe le go tlhaba diruiwa jaaka dipodi  gore ba shabe.

O  tlhalosetse fa  bogodu  bo ka se tlhoke  go gola ka dikgetsi  tsa bogodu jwa leruo  di sa sekiwe.  Mme Maleele o ne a  supa  fa a na le kgetse ya  leruo le le saleng le utswilwe ka  ngwaga  wa 2012 mme e ise e sekwe.

Fa a tsibogela selelo  se , mogolwane wa sepodise  sa  Martins Drift ,Inspector  Maimane  Phele   a re bogodu  jo  bo  dirwa ke   bana  ba metse o o  le  metse e e mabapi.

Insector Phele o tlhalositse fa bana  bao,  ba  tswang kwa metseng  ya Tumasera, Ngwapa, Sefhare, Moshopha le Mokobeng   mme ba ipopile  segopa go utswela batho leruo. 

O tladitse ka gore segopa seo,  se utswela  le masika a bone tota. Inspector Phele  a re ba a leka go lwantsha borukhutlhi  jo e le ba sepodise ,mme  go tlhokana le batsadi go tshwaragana le bone  go lwantsha bosenyi  jo.  BOKHUTLO