14 Jan 2014

Mmakaseterata mogolo kwa Molepolole, Rre William Modise, a re o lemogile fa, mo kgaolong ya gagwe, dikgang tse dintsi tsa melato ya go thuba matlo le bogodu e diragetse mo kgotleng ya Magokotswane kwa Molepolole.

A re seemo sa go nna jalo se tlaa kganela bareki go rotloetsa bagwebi ba kgotla eo mo go ka feletsang go ka diga dikgwebo tsa bone. Mmakaseterata mogolo Modise o buile se fa a lebisa babelaelwa ba le bararo molato wa go thukhutha Rre Jacob Keabetswe.

Go ya ka mosekisi, Sub Inspector Kemmonye Willie wa sepodise sa Molepolole, babelaelwa bao, eleng, Lesego Motshweneng yo o dingwaga tse di masome a mararo, Oabile Mogobe wa dingwaga tse di masome a mabedi le boraro le yo mongwe yo o sa ntseng a batliwa ke mapodise; botlhe e le ba kgotla ya Magokotswane mo Molepolole, ba ne ba kgothosa Rre Keabetswe mogala wa letheka wa modiro wa Blackberry Bold, wa madi a a ka tshwarang P600.

Ba ne gape ba mo amoga sekgwama se se neng se na le madi a a  ka tshwarang masome a mane a dipula, le digalase tsa matlho, tsa madi a a kana ka P1 800 ka Morule a le masome a mabedi le bobedi, kwa Rocklane lodge mo Molepolole. Sub inspector Willie o ne a kopa gore babelaelwa baname ba sa botswa gore a ba ipona molato kgotsa nyaa.

Fa a akgela, mongwe wa babelaelwa, Lesego Motshweneng, o ne a kopa lekgotla gore le mo golole a letele tsheko kwa ntle ka a ne a tlhalosa fa a bone tiro ya nakwana ya go lema kwa masimong a Gakgatla mo kgaolong ya Kweneng. O tlhalositse fa ene a sa itse sepe ka molato ka a ne a fitlhela ntwa e phagetse mme ene a leka go kgaoganya fela.

“Tota ga ke itse gore batho ba ba neng ba betsa mongongoregi ke bomang ka ene e le segopa sa batho, le ene mongongoregi ga ke mo itse,” Motshweneng a tlhalosa. Mogobe ene o ne a tlhalosa fa a ne a leka go thusa tsala ya gagwe e e neng e biditswe ke monongoregi go fitlhela e idibala.

“Re ne re ka tshwara masome a mabedi ka palo, ke gakgamala gompieno re le babedi fa, mme e bile go tlhalosiwa fa wa boraro a batliwa. Re ne re kgaoganya ntwa fa gare ga Jacob yo o neng a laola fa hekeng le Britto yo o neng a batla go tsena moletlo mo Rocklane mme a sa lalediwa,” Mogobe a tlhalosetsa lekgotla.

Sub Inspector Willie o ne a kopa lekgotla go okeletsa babelaelwa malatsi mo kgolegelong a tlhalosa fa ditlhotlhomiso di sa ntse di tsweletse. O ne a tlhalosa gape fa molato o o dirilweng e le o o tlhwaafetseng le tsela e o dirilweng ka yone e le masisi, ka jalo, go tshegetsa babelaelwa e le go ba sireletsa. Sub inspector Willie o tsweletse a re, dithoto tse dingwe ga di ise di bonwe.

Mmakaseterata mogolo Modise o ne a laola gore babelaelwa ba tshegediwe mo kgolegelong a tlhalosa fa seo e le go fa ba bosekisi nako ya go tlhotlhomisa ka tshosologo.

“Go letela tsheko ga lona kwa ntle ga go ganiwe, mme fela go tlaa sekasekwa mo nakong e e tlang go kganela go baya ba bosekisi mo kgatelelong.” Mmakaseterata mogolo Modise a bolela. Babelaelwa ba tlaa iponatsa fa pele ga lekgotla Hirikgong a le masome a mabedi, 2014. BOKHUTLO