14 Jan 2014

Mo maitekong a bone a go dira gore mongwe le mongwe a kgone go bona sepalamo sa setshaba motlhofo, lephata la ditsela le dipalamo la Mahalapye le okeditse  metsamao ya ditsela tse di dirisiwang ke dipalamo tsa setshaba.

Mookamela ditsela kwa Mahalapye, Rre Desmond Dagwi a re tsela ya Mooko e nnile teng morago ga  go dira ditshekatsheko.

A re mo nakong eno go ntse go na le  sepalangwa se le sengwe sa mini bus se se dirisang tsela eo, a tlatsa ka gore mokgweetsi wa sone o ne a dirisa teseletso ya nakwana fela.

A re boradipalangwa ba bangwe ba setse ba ikopetse go tsaya setshaba mo tseleng eo mme  dikopo tsa bone di santse di sekasekwa. Mogolwane yo o tlhatlhobang dipalamo Rre Michael Mazibane a re, tsela e e feta fa  matlong a Botswana Housing Corporation, fa ga makaseterata,  fa matlong a babereki ba ditlhopho (IEC), fa hoteleng  ya Cresta le fa marekisetsong a masha a a tlogang a fela  a Flowertown Towers. 

A re go na le  mogopolo o mongwe wa tsela ya Madiba e e tlaa fetang fa posong ya Madiba  o o duleng ka mongwe yo o kgweetsang dipalamo tsa setshaba.

Mo dikgangnnyeng tse dingwe Rre Mazibane o kgadile bakgweetsi ba dithekisi  ba a reng ba dirisa  maemelo a dibese jaaka ekete ke kwa maemelong a  dipalamo tsa setshaba. A re ga go a tshwanela gore go engwe fa dibese di folosang batho teng, a gatelela gore bakgweetsi ba dithekisi ba tshwanetse go ema  kwa maemelong a dipalamo. A re selo se se dira gore  dithekisi di kgoreletse motsamao wa dikoloi.

Rre Mazibane o boile gape a kgalela bakgweetsi ba dithekisi go folosetsa batho fa dibese di emelang bapalami teng, a re dithekisi di tshwanetse go isa bapalami kwa  malwapeng a bone. A re ke molato gore mokgweetsi  wa thekisi a gane go isa mopalami kwa lapeng la gagwe, a tlatsa ka gore go ka felela go dira gore mokgweetsi  yoo a tseelwe teseletso ya go kgweetsa dipalamo tsa setshaba.

O kgothaditse bapalami go begela   ba ba maleba ka bakgweetsi ba dithekisi  ba ba ganang go ba isa malwapeng.  BOKHUTLO