06 Jan 2014

Borre ba le babedi ba badisadikago mo khamphaning ya Morongwa Security Services ba lebisitswe molato wa polao ya motho.

Pako Ramaeba yo o dingwaga tse di masome a mabedi le boferabongwe wa kgotla ya Bobididi mo Molepolole o ne a itshupa fa pele ga mmakaseterata mogolo, Rre William Modise mo Molepolole bosheng, mabapi le molato wa go bolaya motho.

Go boletswe fa Ramaeba a ne a nyelela mme a tshwarwa malatsi a matlhano morago ga tiragalo, fa mmelaelwa ka ene, Mathata Bakwadi yo o dingwaga tse di masome a matlhano le bone, wa kgotla ya Lekgwapheng mo Molepolole a tshwerwe Morule ale malatsi a masome a mabedi le borataro mme a sa ntse a tshegeditswe ke ba sepodise.

Sub Inspector Kemmonye Willie wa sepodise sa Molepolole, yo e leng mosekisi, o ne a tlhalosa mo potsolotsong gore, motho yo o bolailweng yo, go tlhalosiwa fa a tshwerwe ke babelaelwa kgwedi ya Morule e le masome a mabedi le bone fa ane a utswa mafura a disele kwa Molepolole Institute of Health Sciences mme ba mo gobatsa mogo masisi mo a feletseng a tlhokafalela kwa sepateleng sa Princess Marina mo Gaborone.

Sub Inspector Willie, o ne a kopa lekgotla gore le se ka la nama le kopile mmelaelwa pele gore a bue fa a ipona molato kgotsa nnyaa. O ne a kopa lekgotla gape gore le okeletse mmelaelwa malatsi mo kgolegelong, a tlhalosa fa mmelaelwa a tshwaretswe ka molato o masisi, ka jalo, seo se ka thusa gape go babalela tshireletsego ya gagwe.

Sub Inspector Willie o tsweletse a bolelela lekgotla fa molato o sa ntse ole mosha e bile ditlhotlhomiso le tsone di sa ntse di tsweletse.       

Fa lekgotla le botsa fa ana le sengwe se a ka se buang, Bakwadi o ne a tlhalosa fa go sena sepe mme mmakaseterata a laola gore a name a tshegeditswe mo kgolegelong go fitlha babelaelwa botlhe ba tla fa pele ga lekgotla Hirikgong a le lesome, 2014. BOKHUTLO