04 Dec 2013

Bana ba masiela mo kgaolong ya Kgalagadi ba kopilwe go emelelana le  dikgwetlho tsa botshelo.

Se se builwe ke Rre Lerothodi Baruti, mogolwane wa boipelego mo khanseleng ya Tsabong kwa kalosong ya setlhopha sa  bana bao bosheng.

O tsweletse a tlhalosa  fa khansele ya Kgalagadi borwa e ne ya bona fa go tlhokafala gore bana ba le masome a mararo le bobedi ba dikhutsana  morago fa ba sena go kwala ditlhatlhobo tsa bone tsa lokwalo lwa bosupa,  ba tsee loeto lwa go ya go sidilwa maikutlo kwa dithabeng tsa Tsodilo,  morago ga go lemoga fa ba na  le  dikgwetlho tse ba kopanang le tsone mo malwapeng a a  farologaneng mo metseng ya bone.

O ne a supa fa maikaelelo a loeto loo e ne e le go ya go ba  sidila maikutlo a kutlobotlhoko le agwa sesha mo maikutlong le ditlhaloganyo,  morago ga go tlhokafalelwa ke batsadi ba bone, go  abelana le go gakololana  ka tse di ba tshwenyang kwa  malwapeng le gone go fetola seemo sa botshelo mo diemong tse di farologaneng.

Rre Baruti o ne a tswelela ka go tlhalosa fa loeto lo, lo  ne lo le botlhokwa ka e ne e le yone nako e e siameng ya go tiisiwa, go  nosediwa  le gone go thatafadiwa maikutlo  a bana. 

O  kaile fa dialogane tseo  di tshwanelwa ke go bopagana go ya go ileng  le gore ba rute ba bangwe go tia mo maikutlong le mo moweng jaaka bone.

Rre  Joseph Rakgabanyane  mothusa mokwaledi mogolo go tswa khanseleng  potlana  ya Hukuntsi,  fa a bua mo kalosong ya bana bao,  o ne a tlhalosa  fa go ne ga simolodisiwa lenaneo la  earth methology  ka ngwaga wa 2005 le maikaelelo a lone e neng e le go  rutuntshiwa ga  ba boipelego  gore le bone ba fetisetse dithuto tseo kwa baneng ka  go  ba   kaela, go   ba ruta go ba   gakolola le gone go sidila bana  maikutlo  le gore le bone ba phuthologe ka go ntsha maikutlo a bone mo go  tsotlhe tse ba  kopanang le tsone mo diemong tse di farologaneng tsa botshelo jwa letsatsi le letsatsi.

Rre Rakgabanyane o ne a tswelela ka go tlhalosa fa lenaneo le le simolotswe ka 2005 mo dikhanseleng a supa fa kwa  kgaolong ya Kgalagadi bokone kwa Hunkuntsi  ba ne ba le simolodisa ka ngawga wa 2007 a kaya fa mo ngwageng  ono ba setse ba alositse  ditlhopha makgetho a le lesome le bongwe fa mo kgaolong ya Kgalagadi borwa kwa Tsabong  e le  lekgetho la ntlha le simologa.

Mokwaledi mogolo go  tswa khanseleng ya Hukuntsi  o supile fa puso e ne ya simolodisa lenaneo la go tlhokomela bana ba dikhutsana ka ngwaga wa 1999  morago ga go lemoga fa ba lebanwe ke dikgwetlho di  le dintsi mo malwapeng a masika a ba nnang le bone. A re se se neng se utlwisa  botlhoko ke gore bangwe ba bana bao ba  ne ba tsewa jaaka makgoba  mo malwapeng mangwe,  ka ba ne ba dirisiwa ditiro tse di bokete  ebile ba sa tsene sekole. 

Rre Rakgabanyane  a re gape  morago ga  ditshekatsheko puso e ne ya lemoga fa gape bogologolo bana ba masiela ba ne ba abelwa ba masika go ba tlhokomela  morago ga go tlhokafalelwa ke batsadi ba bone mme ga supega fa  ba sa ba tsee ka tekatekano le bana ba bone le gore malwapa mangwe gape a ne a sena itsholelo go ba tlamela ka tse ba di tlhokang.

Fa  a ama bana bao ka lefoko Rre Rakgabayane o ne a ba gakolola gore ba seka ba inaakanya le ditiro tsa botlhoka tsebe mme ba tlhwaafalele dithuto tsa bone ka thuto e le yone boswa ebile eka ba betlela bokamoso jo bo siameng. 

A tlatsa ka go ba kgothatsa gore ba seka ba inyatsa le go itlhoboga mo botshelong ka e se bone fela ba ba senang batsadi mme mongwe le mongwe a lebanwe ke kgwetlho eo go tswa goo loe. Mongwe wa batsadi ba ba  neng ba le mo loetong le bana Mme Elia Seagalale  o ne a supa fa pele loeto lo tsisitse pharaloganyo mo baneng  ka pele ga lone  bana  ba  ne ba gateletswe ke kutlobotlhoko e ntsi.

O supile  fa morago  ga go ntsha matshwenyego a bone ba itshupile fa ba nonofile ebile ba itekanetse ka ba ne ba  sidilegile maikutlo mabapi le dikgwetlho tse a neng a lebagane le tsone. Mme Seagalale  o ne a kopa  batsadi  ba eleng batlhokomedi ba bana bao,  go   ema  nokeng  bana bao ka dinako tsotlhe mo dithutong tsa bone  ka seo se ka thusa thata mo  tokafatsong  maduo a bone. BOKHUTLO