26 Nov 2013

Banana ba basetsana kwa Letlhakeng ba ba nnileng le kgwetlho ya go tshola bana ba le dingwaga tse di kwa tlase, e bile ba sa ntse ba tsena dikolo, ba kopile mmaboipelego go ba thusa go itshimololela kgwebo.

Fa a bua mo bokopanong le mmaboipelego, mothusa modulasetilo wa setlhopha seo sa bomme sa Young Mothers, Mme Gopolang Keoagile, o tlhaloseditse mmaboipelego fa setlhopha sa bone se eletsa go simolola kgwebo ya go dirisa morama go dira botoro fa ba ka bona dithuso.

O kaile fa ba na le dikgwetlho mo motseng ka ba tlhoka ditiro ntswa ba lebanywe ke go tlhokomela bana ba bone. Mme Keoagile o kaile fa kgwebo ya bone e tlaa tlhamela bangwe ditiro le gone go ba thusa go itshetsa ka ditsatlholego.

O tsweletse a bolelela mmaboipelego fa ba tla tlhoka thuso ya madi le thuto e e tseneletseng ka go rekisa le go tlhokomela kgwebo ya bone. E rile a ba ama ka lefoko, mmaboipelego, Mme Tshireletso Thobega, a ba gakolola gore ba ikopanye le bagwebi ba ba setseng ba tsweletse ka kgwebo ya go dirisa morama kana ditsa tlholego; go anywa botsipa mo go bone.

O ne a bua jalo a ba lemotsha le kgwetlho ya go dira ka ditsa tlhogelo, ka di bonwa ka dipaka tse di rileng. Mme Thobega o ne a kopa maloko a setlhopha seo go nna pelotelele fa ba sa ntse ba emetse thuso. Bokhutlo