12 Nov 2013

Banni ba Ramonaka mo kgaolong ya Kgatleng Botlhaba ba boleletse mopalamente wa bone fa ba sa bone poelo le mosola wa tlhopho ya bone.

E rile banni ba ntsha matshwenyego le dingongorego tsa bone mo phuthegong le mopalamente wa bone Rre Isaac Mabiletsa, ba supa fa motse wa bone o sena tswelelopele ka o tlhaelelwa ke ditlamelo le ditlhabololo.

Ba re motse wa bone o na le dingwaga go sena diphetogo dipe tse di kalo mo go one ka dilelo tsa bone di sa reediwe. Ba boletse fa metse ya Mmathudukwane le Malolwane e tlhabologile go ba feta ntswa ba le fa gare ga yone; mme ebile ba supa fa ba le sebete se molangwana ka kgang eo.

Mme Dolly Pule a re ga go nko e tswang lemina mo go arabeng dilelo tsa bone, mme ba tswa kgakala ka go kopa gore ba tsisediwe ditlamelo mo motseng wa bone. A re e setse e le dingwaga di feta masome a mane mme go ntse go tshwana fela; a tlatsa ka gore ga ba itumelele seo ka le khansele e palelwa ke go ba baakanyetsa tsela e e seng kalo.

O ne a supa fa ba sena le one mogala mo kgotleng ya bone le yone koloi tota go tsamaisa ditiro tsa lekgotla. Mme Pule a re ene ga a bone mosola wa gore ba tswelele ba tlhopha ka seo se sa ba sologele molemo ka gope.

A re sengwe gape se se sa ba jeseng diwelang ke mokhanselara wa kgaolo ya bone yo o tlhabololang motse wa Malolwane a tlogela wa bone. Rre Collen Nakedi le ene o ne a bua a sa kgwe mathe, a supa fa maikutlo a bone a gogomogile ka jaana go sena sepe se se tsamayang sentle mo motseng wa bone.

A re sebe sa phiri ke gore palo ya motse wa bone e nnye, mme ba batla gore ba nne le mokhanselara wa bone gore kgaolo ya bone e tle e sekegelwe tsebe. Rre Nakedi o kopile mopalamente gore a tle a tlhophe mokhanselara mo kgaolong ya bone fa a ka boela ka ditlhopho tsa 2014 gore dilelo tsa bone di reediwe botoka.

E rile mopalamente Rre Mabiletsa a araba banni ba motse oo, a supa fa a itse sentle ka seemo sa motse wa bone mme a kopa gore ba lemoge fa ditlhabololo tsa lefatshe la Botswana di bereka ka thulaganyo ya lenaneo la ditlhabololo. Rre Mabiletsa a re o lela selelo se le sengwe le bone mme e bile o itse sentle gore banni ba tlhoka eng; a tlatsa ka gore o tla tswelela a ba kopela tsotlhe tse ba di tlhokang.

A re puso e na le ka fa a dirang dilo ka teng, mme le fa go ntse jalo, ba seka ba tlelwa ke boitlhobogo ka tota tsholofelo e sa tlhabise ditlhong; dilelo tsa bone di tla arabiwa motlhamongwe. BOKHUTLO