20 Oct 2013

Banni ba Khudumelapye mo kgaolong potlana ya Letlhakeng ba supile fa ba sa itumelele kompone ya metsi ya Water Utilities Corporation. Ba buile jalo mo phuthegong ya kgotla e e neng e tshwerwe ke mopalamente wa Letlhakeng Botlhaba Rre Liakat Kablay.

Mongwe wa banni ba motse oo Rre Ongaletswe Bojosi, o kgadile a sa kgwe mathe  kompone eo a re fa e sale e tsaya ditirelo tsa metsi mo khanseleng le Water Affairs ga ba bone metsi sentle. Mo mafokong a gagwe a kamogelo,  kgosi ya motse oo  Rre  Edwin Ramokobetwane  o supile  fa  a sa kgotsofalele tsamaiso e e dirwang ke ba kompone ya metsi  ka a re e diegela go baakanya dipompo tse di dutlang mo go felelang go dira matangwana a a okang leruo mme go felele go leswefatsa tikologo.

Kgosi o tsweletse a supa fa a sa itumelele tirisano mmogo ya bone e le bogogi jwa motse le khansele potlana ya Letlhakeng fa go tla mo ditlhabololong tse dingwe tse di dirwang ke khansele ka ga sa dirwe tekodiso le bone sentle.

Fa a buisa banni ba Khudumelapye, Rre Kablay o supile fa  puso e tlaa tseela bana ba ba ingaolang le ba ba senyang dikago  tsa sekolo dikgato  tse di gagametseng mme a gakolola batsadi ba bana go  tshwaraganela thuto ya bana le puso le barutabana. O tsweletse a supa fa puso e tshwenngwa ke batsadi ba ba rekisetsang bana ba dikolo ditagi di tshwana le motokwane.

Rre Kablay o ne a tlhalosetsa banni gore motse wa bone o ne wa amiwa ke phetogo ya melelwane ya botlhophi ka jaana e tlaa re mo ditlhophong tse di tlang a bo a sa tlhole a le mo kgaolong ya Letlhakeng Botlhaba mme o tlaa wela kwa go ya  Letlhakeng Bophirima e e tla bong jaanong e bidiwa Takatokwane.

O ne a gakolola banni ba motse oo gore le mororo ba sa itumelele tshwetso e e dirilweng ya kgaoganyo melelwane, ba ikwadisetse ditlhopho ba tlhophe baemedi ba ba tla ba emelang kwa khanseleng le kwa palamenteng ngwaga o o tlang. Fa a mo kgwa dikgaba mongwe wa banni Rre Ferney Ramaeba o ne a kopa gore puso e tsibogele go direla batho bo omang mo motseng wa bone, ka bontsi bo sena bo omang ebile ba tlolwa ke mananeo a puso ka lebaka le. BOKHUTLO