13 Oct 2013

Bomme ba kereke ya UCCSA ya Serowe ba gakolotswe go jwala le go tsweledisa mowa wa boikgapho mo go bomme ka kakaretso.

Mafoko a, a builwe ke moeteledipele wa kereke, Mme Molebi Morolong, kwa moletlong o neng o tshwaretswe bomme ba kereke eo, ba ba sa tlholeng ba kgona go kereka ntateng ya bogodi. Mme Morolong o ne a tlhalosa gore, o itemogetse gore bagodi ba, ba ne ba gatetse pele ka boikgapho le bopelotele, mme ka seo ba ka amogana le bomme ba gompieno maele a.

A re maikaelelo a moletlo e ne e le go leka go phutlha bomme gore ba anywe maele a ka  bomme ba pele ba neng ba tsamaisa merero ya kereke le go itsaa motlhala e le batsweledisi go bona fa ba tlhaelang teng. Le fa go ntse jalo, Mme Morolong  o ne a  supa fa  bomme ba banana ba sena bobelotelele le boikgapho jo ba bo supegediwang ke ba bagolwane.

A re go a tlhobaetsa go bona bomme ba banana ba fitlhwelwa ba amanngwa le ditiro tsa botlhoka tsebe, a tlatsa ka gore mosadi o tsewa e le thari ya sechaba, ka jalo serodumo sa teng se tshwanetse go tshegediwa le go jwalwa mo dikokomaneng.

Mme Morolong o tsweletse a re go a itumedisa go bona bomme ba ba sa tlholeng ba na le maatla a go ka phuthega kwa kerekeng ka ntlha ya bogodi le bolwetsi, ba santse ba na le keletso e ntsi mo tsamaisong ya kereke.

Fa a tswa la gagwe mongwe wa bagodi ba, Mme Sennye Kgosimoloi a re nako ya bone ba ne ba ikgobokanya ba dire tiro tsa diatla di tshwana go apaya le go roka ba dirisa masalela a didirisiwa, e re morago ba rekise go kgobokanya madi a letlole.

A re ba ne ba phutlhagana go rutana le go kgothatsana mo lefokong la Modimo bas a tlogele ditiro tsa bobelotlhomogi kwa morago.O kgaletse bomme ba banana go ikaega thata mo go rekeng, a bolela fa bone ba ne dirisa dijo tsa naga, tse di sa thokeng theko,ka jalo ba boloke madi.

Mme Kgosimoloi  a re go bo ba santse ba tsweletse mo tirong ya Modimo ke bobelotelele le boikgapho. A re nako tsa bone e ne e re ngwana ga a thokile boikarabelo, o le motsadi o kgaolwe mo ditirelong tsa kereke, ka jalo se se ne sse sa ba kgobe marapo, mme ba tswelele fela.

O bile a re boikgapho bo ba thusitse ka ba  ne ba kgona go apara ka mokgwa o haphegileng o supa tlotlo mo mothong wa mme. Tshisibalo e ba neng ban a le yone a re e ba thusitse go ka tswelela pele le go godisa malwapa a bone, ka ba ne ba tlotla banna ba bone.

Mme Kgosimoloi a re e re letswa tekatekanyo e rotloediwa, e kgona go baka ketsaetsego ka malwapa ka bontsi a thubiwa ke go leka go goga malwapa boo babedi, a tlatsa ka gore ga e nke e etelelwa pele ke e namagadi. Bokhutlo