10 Oct 2013

Bomme ba motse wa Bobonong ba ka nna lesome ba ipopile setlhopha go itshetsa ka go kgobokanya le go rekisa majwe.

Majwe a, a a bidiwang Carnalian, Botswana Pink le Agate, a bonala thata mo kgaolong ya Bobirwa. Moeteledipele wa setlhopha se, Mme Ndu Ngwako o tlhalositse se morago ga leeto la molaodi wa kgaolo ya Bobirwa, Rre Mompoloki Mochanang bosheng.

Mme Ngwako o boletse fa ba sale ba simolola tiro e ya bone ka ngwaga wa 1993, mme ba sela majwe a kwa masimong a Keisane le go ralala naga ya kgaolo ya  Bobirwa. O tlhalositse fa mo tshimologong ya bone bane ba rutiwa mefuta le boleng jwa majwe a, le gore a ka ba sologela molemo jang ke Rre Rapelang Nkgowe wa kompone ya Masa Semi Precious Stone.

A re Rre Nkgowe o ba thusitse fela thata ka e bile ba rekisetsa khamphani ya gagwe majwe o ne a. O supile fa majwe a bone a rekwa ka dikanti tsa dilithara tse di masome a mabedi  e bile a rekwa go ya ka boleng jwa one.

Mme Ngwako o boletse fa majwe a boleng jo bo kwa godimo a rekwa masome a mathano a dipula kgotsa e le nngwe, fa a boleng jo bo kwa tlase a rekwa  ka masome a mararo le bothano kanti ele nngwe go ya ka mofuta wa majwe a.

O ne a lebogela botsipa  jo ba bo neetsweng ke Rre Nkgowe mme a solofetsa fa ba tlaa tswelela ba dirisa botsipa jo a ba bo neetseng go itshetsa. E rile a tswa la gagwe, Rre Nkgowe a tlhalositse fa a le motlotlo go bona a kgonne go tlhamela Batswana ditiro mo nakong  e letlhoko la ditiro le ileng magoletsa mo lefatsheng leno.

O boletse  fa tirisano mmogo ya bomme ba e dirile gore kompone ya gagwe e bo e le fa eleng teng ebile e itsega kwa mafatsheng aa tsididi. Rre Nkgowe o lebogetse seabe sa bomme ba mo kgwebong ya gagwe e bile a tlhalosa fa tirisano mmogo ya bone e gola ka nako tsotlhe.

Rre Mochanang ene o tlhalositse fa seabe sa ga Rre Nkgowe mo go kabakanyeng  itsholelo ya lefatshe leno se bonwa  ke mang le mang. Rre Mochanang  o boletse fa Rre Nkgowe a bile a ne a tlhophiwa go nna mongwe wa ba Batswana  ba Tautona a neng a ba abelang dietsele ka malatsi a boipuso go ba lebogela ka fa ba kabakanyang itsholelo ya lefatshe  leno ka teng.

O ne a rotloetsa Rre Nkgowe le bomme ba go tswelela ba tshwaragane gore matshelo a bone tokafale ka puso ya lefatshe leno e eletsa go bona batho ba yone ba tshela sentle. Bokhutlo