25 Sep 2013

Bodiredi jwa khansele ya bokone bophirima bo ne bo kokoane kwa dikagong tsa khansele ka moono wa go rapelela dikgwetlho tse di apereng lefatshe leno.

E ne ya re mokwaledi wa khansele, Rre Kwele Puso a bolela maikaelelo a kokoano eo, a tlhalosa fa ba dira ditso ka jaana e le la ntlha ba tshwara tiro ya sebopego seo. A re se ba se dirang ke tshimologo ka le bone ba lemoga fa thapelo e le yone konokono mo go rarabololeng dikgwetlho tse di apereng lefatshe.

Rre Puso o boletse fa maiakelelo magolo a tiro eo e le go kopana le morafe ka moono wa go kopa ditshegofatso kwa Modimong. A re mafoko a Baebele a bolela gore fa bana ba motho ba kopane lentswe la bone le tlaa goroga mme le arabiwe.

A re maikaelelo ke go rapelela diemo jaaka malwetsi a a sa foleng, komelelo e e anameng mo lefatsheng ka ntlha ya letlhoko la pula, leuba, ditlhalano, dipolaano, borukutlhi le dithubetso tse tsotlhe a reng di bakwa ke mmaba. A re lefoko la Modimo le thapelo di nonofetse go kgalema seemo seo mme a supa fa ba na le tsholofelo ya gore ba tlaa arabiwa.

Modulasetilo wa khansele, Rre Latlhang Molonda le ene o ne a tshwaela ka gore se ba se dirang ke karabo ka jaana tautona a boloditse Letsholo la dithapelo tsa pula. A re o dumela gore mo Modimong ga go sepe se se ka palang a tlatsa ka gore se se botlhokwa ke tumelo le poifo Modimo. Rre Molonda a re Modimo ga a reetse dithapelo tsa batho ba dipelo tsa bone di kwatlaletseng.

O ne a leboga tautona a bo a mo tshwantshanya le motlhanka wa Modimo Solomon yo o botlhale a supa fa tautona a tletswe ke lesedi la go kopa dikereke go ema ka dinao go rapelela pula. A re mo kgaolong ya bokone bophirma ke selelo le khuranyo ya meno ka jaana baagi  ba dikile ba latlhegetswe ke leruo le feta 15 000 ka ntlha ya leuba.

A re o dumela fa ngwaga ono go tlaa nna le dipula tse di nametsang mme batho ba kgone go ipeela ditema go ijesa. E ne ya re a lebogela tiro, mothusa mokwaledi wa khansele Rre Masiela Mandoze a galaletsa barulganyi ba tiro eo a supa fa e le ruri merapelo ya bone e tlaa arabiwa. BOKHUTLO