25 Sep 2013

Baagi ba kgotla ya Mathumo kwa Tutume, ba re ba itumelela tshutiso ya molao o o laolang batho gore ba thusiwe fa molelwaneng o le mongwe fa ba etela kwa mafatsheng a sele, e seng jaaka pele fa ba ne ba thusiwa mo dikgorong tsa mafatshe oo mabedi.

Ba supile seo mo phuthegong ya kgotla e tshwerwe ke mopalamente wa kgaolo ya Nkange, Rre Edwin Batshu kwa kgotleng eo bosheng.   Ba re seo se tlaa fefosa mesepele ya batho.

Rre Batshu, yo ebileng e le tona wa pereko le selegae, o ne a ba rerisa ka melao e e sa tswang go fetisiwa kwa palamenteng jaaka o o akaretsang molao wa makgotla a Setswana. A re dituelo tsa dikatlholo mo makgotleng a Setswana di okeditswe go tswa mo go P50 go ya kwa go P500.

O ne gape a re go dumalanwe ka tsamaiso ya diphologolo tsa naga, a re go tswa kgakala kgotlhang ya batho le diphologolo e sa rarabologe.
A re ka tsamaiso eo, ba tlaa leka go ntsha megopolo  ya gore ba ka tshela jang le diphologolo.

Tona Batshu o ne a bolela fa dituelo tsa phimolo dikeledi fa balemi-barui ba senyeditswe ke diphologolo di fetotswe go duelwa go lebilwe ka fa tshenyo e diragetseng ka teng. Mo go tse dingwe, Rre Batshu o ne a ba kopa go itlhatlhobela mogare wa  HIV, a re bolwetse jwa AIDS ga bo ise bo bone kalafi ka jalo ba ikgaphe mo tlhakanelong dikobo e e sa sireletsegang gape le go hema kanamo e ntsha.

O ile a ba kopa go rotloetsa bana ba bone ba ba lekaneng go ikwadisetsa ditlhopho go dira jalo ka nako ya ikwadiso ditlhopho, e e simololang ka kgwedi ya Phalane. O ile a rotloetsa banni go ntshafatsa bo Omang ba bone ba sa ntse ba saletswe ke dikgwedi tse di lesome.

Rre Tshabang Nkhare o ne a lela ka mananeo a banana a re a beile bangwe ka fa mosing ka ga ba kgone go fitlhelela tse di batlegang ka ntlha ya go tlhoka madi a go dira tse di batlegang. Tona o ne a araba ka go re  puso e leka ka bojotlhe go ntsha ka mananeo le go a tokafatsa go thusa banana.

A re puso e  ikaeletse go thusa banana ka bontsi, go ba ntsha mo lenaneong la  Ipelegeng. A re  le thulaganyo ya go boela gape kwa sekoleng ke tsela nngwe ya go thusa banana ba ba nyoretsweng go ithuta go tsweledisa dithuto tsa bone. BOKHUTLO