16 Sep 2013

Monana wa  kgotla ya Sebolaongwe kwa Letlhakeng, Rre Maiteko Ramatlhaosa, a re  borukutlhi le boganana bo senya bokamoso.

Ramatlhaosa yo e kileng a bo e le legolegwa, o boletse mo potsolotsong gore ga a a ikaelela go tshela botshelo jo a kileng a bo tshela kwa kgolegelong mme ka moo a itlhamela khamphani a e bitsa Crime Close e e, kwadisitsweng ka fa molaong,  a na le modiri ka ene go thusana tiro.

Rre Ramatlhaosa a re kompone ya gagwe e itebagantse le go rutuntsha banana mo dikoleng, go ba lemotsha fa borukutlhi le botlhokatsebe di sa busetse.

O tlhalositse gore go ne go se monate go tshelela kwa kgolegelong,  a re o setse a kopile thuso kwa go  ba boipelego le ba ofisi ya ga molaodi, e bile a solofela kemonokeng eo.

 A re ba ne ba eletsa go tsamaya le dikole tsa kgaolo ya Kweneng go ruta bana ba dikole ba dirisa bodiragatsi kana dibaesekopo go fetisa molaetsa. 

Rre Ramatlhaosa o tsweletse a tlhalosa fa a setse a utlwile matshwenyego a puso ka ditiragalo tsa bosheng tse di dirwang ke banana mo dikoleng,  jaanong a bona go le botoka gore ba tsenye letsogo go thusa puso go aga tshaba ya Botswana. Bokhutlo