23 Jan 2013

Mokhanselara wa Makgobokgobo kwa kgaolong ya Okavango, Rre Kitso Ngande a re, e re ntswa  go tshwarwa segopotso sa ipabalelo tseleng ngwaga le ngwaga, go lebega go lebalwa go ruta setshaba ka ipabalelo mo metsing.

Mo potsolotsong le BOPA, Rre Ngande a gwetlhile puso go dira molao o o sireletsang batho ba ba dirisang mekoro. A re mo nakong eno, badirisi ba mekoro fa ba na le mathata molao ga o ba sireletse jaaka go diragala ka badirisi ba tsela, ba ba thusiwang ke ba lekgotla la Motor Vehicle Accident (MVA).

Mokhanselara a re ka jalo, badirela puso bangwe ba kgaolo ya Nhabe ba tshaba go isa ditlamelo kwa bathong ba metse e tshwana le ya Jao le Xaxaba ka jaana go se na molao o o sireletsang batho ba ba dirisang mekoro.

Molomaganyi wa lekalana la MVA le setshaba, Rre Thabo Morotsi a tlhalositse fa ba sa kgone go akaretsa batho botlhe ba ba amiwang ke dikotsi ka molao o sa ba letle go dira jalo. O tlhalositse fa go le mo maruding a badiragatsi ba molao go tla ka mogopolo oo. Bokhutlo