09 Sep 2013

Mothusa mookamedi wa sesole sa Botswana, Major General Placid Segokgo, o akgoletse komiti ya sesole ya HIV/AIDS kwa Maun maiteko a bone a go dira pharologanyo mo go  ba ba tlhokileng lesego.

O lebogile maloko a komiti eo jaaka a ne a rolela  Mme Cathrine Modise ntlo, le ntlwana ya boitiketso ga mmogo le pompo semmuso. Mo godimo ga moo, batsena moletlo wa go aba dimpho tseo ba ne ba kgobokanya madi a a fetang P1000, go abela ba lelwapa la ga Modise go inamola leuba.

Major Gen. Segokgo a re go a itumedisa go bona ba sesole ba supa le go tshegetsa mowa wa bojammogo ka go tsenya letsogo mo setshabeng gore batho ba lemoge fa tiro ya bone e se go ba sireletsa fela mme ba kgathala ka Batswana ba bangwe.

O tsweletse a re o itumelela gore go bo go rena kagiso le thokgamo mo lefatsheng leno, a re seo ke sekai sa gore e le ruri masole ga se baba ba morafe.

Major Gen. Segokgo o ne a kgothatsa Mme Modise go leboga Modimo go bo bana ba gagwe ba mo gopotse ka go mo direla bontle, a re o solofela fa mo nakong e e tlang, ba tlaa dira go feta foo.

Fa a tlhalosa ka dimpho tseo mogolwane wa sesole ebile e le mogokaganyi wa komiti ya HIV/AIDS kwa Maun Rre Philip Searobi, o ne a bolela fa ba ne ba itshwaraganya le ba ofisi ya boipelego go ba batlela mongwe yo ba ka mo thusang.

A re le bone ba bone go tshwanela go supa seabe sa bone mo go diragetseng lengwe la matshego a tebelopele ya setshaba le le buang ka tshaba e e lerato ebile e kgathala ka ba ba tlhokileng lesego.

A re se ba se dirileng gape ke karabo ya mokgosi wa ga Tautona ka jaana a kopile Batswana ka kakaretso go thusa ba ba dikobo dikhutswane ka go ba fa seriti.

Mme Modise o ne a galaletsa ba sesole, a re ba mo namotse mo tshotlegong.

A re o ikutlwa a na le seriti ka jaana a kgona go robala boroko kgo. Bokhutlo