01 Sep 2013

Mo maitekong a bone a go nyeletsa lehuma, banana ba Dimajwe kwa kgaolong ya Serowe Bokone Bophirima, ba tlhamile lekgotla la koporase e ba tlaa ithusang ka yone gammogo.

E rile a bua kwa dithuto puisanong di rulagantswe ke ba lephata la dikoporase kwa motseng oo mo bekeng eno, mogokaganyi wa koporase eo, Rre Sam Tlhaodi, a tlhalosa  gore koporase ya bone e tlaa bo e dira marotho ka mefuta le dijeme tsa marotse, magapu le morula.

Rre Tlhaodi a re ka ntlha ya gore ba kgakala le ditlamelo,  ba ne ba tswa ka mogopolo wa itshetso. O tsweletse ka gore e re ntswa maloko ka bontsi e le bomme ba ba sa rutwang go dira dijeme, dipaakanyo di tsweletse go ya go rutuntsha bomme bao ka kgwebong ya go dira dijeme.

A re dithuto tse di  tlaa nonotsha bomme mo  kgwebong ka e bile e le bone ba amilweng le lehuma bobe. A re ba tlhophile mofuta wa kgwebo wa koporase ka o le motlhofo go tlhamega e bile o itebagantse thata le go kotafatsa itsholelo ya maloko.

Rre Tlhaodi o tsweletse ka gore mo mafatsheng a mangwe, dikoporase di na le seabe se segolo mo tsamaisong ya itsholelo ya mafatshe e bile di fa dikompone tse di ikemetseng le tsa puso kgaisano e e mashetla. Mothusa motlhomamisi wa dikoporase, Rre Motse Otlhabanye, o ne a akgolela banana ba Dimajwe go tsaya  kgato ya go tlhama koporase ka e ka tlhabolola motse wa bone.

Rre Otlhabanye o ne a tlhagisa maloko gore gantsi dikoporase di digwa ke gore maloko a nna pelotshetlha fa a bona madi a nna mantsi mme ba a je, phelelong kgwebo e we.

A re mo malobeng, dikoporase di ne di digwa ke go tlhoka go ipaakanyetsa kgaisano le ba bangwe ba ba fang ditirelo tse di tshwanang le tsa bone, a tlatsa ka gore mo malatsing ano go na le dithuto tsa go tsamaisa dikgwebo le go gaisana mo mebarakeng, ka jalo maloko a di sole molemo gore kgwebo e se ka ya phutlhama.

O tsweletse ka gore lephata la gagwe le tlaa nna le thusa ka go dupa dibuka tsa bone le go fa bogakolodi fa koporase e sa ntse e simolola. BOKHUTLO