21 Jan 2013

Badirelapuso kwa Seronga mo kgaolong ya Okavango, ba boleletse mopalamente wa kgaolo, Rre Bagalatia Arone gore ba kopa go agelwa tsela. Ba buile jalo mo phuthegong e mopalamente a neng a e tshwerwe  bosheng, fa a lekola kgaolo ya gagwe.

Mogokgo wa sekole se sebotlana sa Seronga, Mme Lillian Mathumo, o tlhalositse fa letlhoko la tsela e e siameng le kgoreletsa badirelapuso ba bantsi go ithekela dikoloi. A re ga ba itumedisiwe ke letlhoko la motlakase le tirisano ya bodirelapuso. O tladitse ka gore bana ga bana dibuka le ditlamelo tse dingwe tsa sekole.

O tlhalositse fa go tlhokisa baithuti ditlamelo e le go ba  kgokgontsha mme a fa sekai sa gore fa go ne go na le tsela e e siameng, ba ka bo b ba dirisa dikoloi tsa bone go latela dibuka tse di tlhokegang.

Mopalamente Arone o ne a ba kgothatsa go itshoka ka jaana go sa ntse go baakanngwa seemo. O akgoletse badirelapuso go itshokela go direla kwa kgaolong e e nang le dikgwetlho ya Okavango. O buile gape gore go dirisana le maphata a mangwe a puso go botlhokwa thata.  Bokhutlo