26 Aug 2013

Kgosana ya kgotlana ya Dandane kwa Bobonong, Rre Thuso Kgosietsile Agosi o fologa setilo sa bogosi sa kgotlana eo ka mabaka a  botsogo.

Rre Agosi o na le dingwaga tse masome a mabedi e ntse e le kgosana ya kgotlana ya Dandane, mme e bile a le dingwaga  di le masome a supa le bobedi. O sale a ntse kgosi ya Dandane ka ngwaga wa 1993 a tsaya mo go rrangwaneagwe , Rre Jane Letubo.

Mo potsolotsong, o tlhalositse fa a tlaa tlogela setilo sa bogosi sa kgotlana eo mo kgweding  ya Ngwanatsele e ya fifing. Rre Agosi  o boletse  fa e tlaa re mo kgweding  ya Lwetse a tlhola gangwe  a dire mokwalo wa ikopelo go tlogela tiro o o tshwanetseng go dirwa mo kgweding tse tharo pele motho a togela tiro ka fa molaong.

O tlhalositse fa a tlaa tlhatlhangwa ke morwae,  Rre Tomeletso Kgosietsile  Agosi  yo o tlaa thusanang  le rangwaneagwe, Rre Emogang Kgosietsile. Rre Agosi o kopile morafe wa Dandane go dirisana sentle le morwae yo o mo tlhatlhamang fela jaaka ba dirisantse sentle le ene nako e a neng a santse a le kgosi.

O boletse fa e tlaa re kgwedi  eno  e ya fifing a bitse phuthego  go tla go laela morafe wa kgotlana ya gagwe ka jalo o kopile morafe wa Dandane go tla phuthegong  e ka bontsi  gore a tle go ba laela. Kgosi ya Babirwa Kgosi Mmirwa  Malema o tlhalositse fa  Rre Agosi a buisantse le ene ka go tlogela tiro ga gagwe.

Kgosi Malema  a re o dumalane  le ene  gore a tlogele  tiro ya bogosi  ba lebeletse botsogo  jwa  gagwe  ka a setse a latlhegetswe ke pono.

BOKHUTLO