26 Aug 2013

Motlobo wa dibuka wa Molepolole, o o saleng o tswalwa ka kgwedi ya Mopitlo monongwaga o simolotswe go dirisiwa kgwedi eno e le masome a mabedi le borataro.

Motlobo o o ne o tswetswe ka o ne o fudusediwa  kwa lefelong le legolwane, le lesha, le le neng la agiwa go lebilwe kgolo ya palo ya badirisi le motse. Moanamisa mafoko, Mme J. Motshome, a re ntswa o tlaa bo o ise o bulwe semmuso, ba ne ba patelesega gore o name o dirisiwa mo nakong eno  ka jaana go ne go le lebaka o tswetswe.

A re ntlha e nngwe e e ba gwetlhileng ke ya gore motlobo wa dibuka o botlhokwa ka o na le seabe mo dithutong le dikitsiso fela jaaka dikole. Mme Motsheme a re ba tlaa o bula semmuso mo nakong e e sa fediseng pelo ka o setse o fedile e bile ba pakile dibuka.

O ne a rotloetsa badirisi ba basha go ikwadisa go nna maloko gore ba kgone go adima dibuka. Motlobo wa dibuka o ka fa kgotleng ya Borakarakalalo fa morago ga lebala (stadium) le legologolo. O tlaa bulwa ka dinako tsa 07.30 phakela tsena ka  4.30 maitseboa. BOKHUTLO