15 Aug 2019

Mothusa mokwaledi wa khansele-potlana ya Maun Mme Pedzani Mahama a re ba mo lenaneong la go dira lesaka la matimela kwa Sehithwa mo bogautshwaneng.

Mme Mahama o tlhalositse jaana fa a bega ka matimela mo thuto-puisanyong e e neng e rulagantswe ke ba sepodisi go lwantsha bogodu jwa leruo kwa Sehithwa ka Laboraro.

O supile fa khansele-potlana ya Maun e baakantse madi le didirisiwa tsa go aga lesaka leo, mme ba santse ba letile go abelwa lefelo ke ba lekgotla la kabo ditsha.

Mme Mahama o supile fa lesaka leo le tlaa oketsa palo ya masaka a matimela a a mo kgaolong ya Bokone Bophirima go nna boraro,.

A re go ntse go na le masaka kwa metseng ya Tsau le Makalamabedi.

O ne a supa fa khansele e tshwenngwa ke dipalo tse dintsi tsa matimela a a sa boneng beng.

A re khansele eo e phutha matimela go ka nna ga raro mo ngwageng ka go tsamaya phatlalatsa mo metseng mme leruo le lengwe le ka begwa ke banni.

Ka jalo Mme Mahama o ne a gwetlha banni ba metse e e farologaneng go bega leruo le e seng la bone go na le go batla go le rua ka bogotswana.

A re Kkhansele e a senyegelwa go tlhokomela matimela ka e reka dijo le melemo le go atswa badisa le badiri ba yone.

“Lesaka la Makalamabedi mo bogompienong le na le dikgomo di le masome mararo le bobedi, ditonki tse di lesome le boraro le dipodi tse di masome matlhano le borataro, fa la Tsau le na le dikgomo tse di masome mane le bosupa le dipodi tse di ferang bongwe.”

Le fa go ntse jalo, o tlhalositse fa khansele e kgona go rekisa leruo le le sa tsewang ke beng, a supa fa khansele ya Bokone Bophirima e rekisitse leruo bosheng mme ya bona P119 313. 

Mme Mahama a supa fa bontlha bongwe jwa madi ao jwa selekanyo sa P33 000 bo ne jwa dirisiwa go rekela leruo le le setseng  mo masakeng a matimela dijo.

O ne a tlhalosa fa nngwe ya dikgwetlho tsa matimela e le kgotlhang ya batho le diphologolo tsa naga, a supa fa ditlou di dira gore badisa ba tshabe ka dinako dingwe.

Mme Mahama a re khansele e mo lenaneong la go dira maiteko a go phutha leruo la matimela ntlheng e go nang le dipolasi tsa Hainaveldt, a re go tlhoka gore go dirwe lesaka la matimela teng.

Mongwe wa batsena dithuto-puisanyo tseo, Mme Kerekang Mmeleri wa Sehithwa o ne a leboga ba khansele go bo ba utlwile selelo sa banni ba Sehithwa ba ba neng ba kopa gore lesaka la matimela le tsisiwe gautshwane. BOKHUTLO