20 Aug 2013

Batsadi ba bana ba ba tsenang sekole se sebotlana sa Khudumelapye ba kopilwe go tshwaraganela thuto ya bana ba bone le barutabana.

Mafoko ao a builwe ke mogokgo wa sekole seo, Mme Nancy Mukuwa mo phuthegong ya batsadi le barutabana bosheng. Mme Mukuwa o rotloditse batsadi botlhe go ikitaya ka thupana le go ipha nako go nna le seabe sa go latedisa  seemo sa thuto ya  ngwana bogolo gabedi mo setlheng.

O tsweletse ka go kopa batsadi go ne ba letlelela bana ba bone go tla sekolong ka mafelo a beke go tla go tlhatlhelelwa fa ba saletseng morago teng mo dithutong.

Mme Mukuwa o supile fa a tshwenngwa ke seemo sa bana ba ba tlang morago ga nako mo sekolong ntswa ba nna le batsadi kwa malwapeng, a supa fa botsamaisi jwa sekolo bo ikemiseditse go tsisa maduo a a botoka mo ditlhatlhobong tsa lekwalo la bosupa.

Mongwe wa batho ba motse oo Rre Mmadianakedi Padime o akgoletse barutabana ba sekolo seo tshwaragano e ba nang le yone le bone.
O supile fa a itumetse go bona maduo a a nametsang  fa e sale ngwaga o simologa. Bokhutlo