18 Aug 2013

Banna ba le babedi ba tlhokafetse mo kotsing ya koloi bosheng kwa Kanye.   

Mogolwane wa mapodisi a Sejelo kwa Kanye, Superintendent Baakile Moshashane, a re koloi ya modiro wa Hilux e thulanye le bese e e tsamaelang kwa Ghanzi ya JNG.  

Supt Moshashane a re koloi ya Hilux e ne e tsena mo tseleng e tswa mo letlhakoreng, fa bese yone e ne e tlhamaletse mo tseleng ya Jwaneng/Kanye, fa maemelong a dipagamo a Mahube kwa Kanye. 

A re banna bao ba ba neng ba le mo koloing ya Hilux ka boraro  ba tswa mo Kanye, mme a tlhalosa fa yo mongwe a sa ntse a le mo kokelong go alafelwa dikgobalo tse di masisi.

 A re go tlhokafetse monna wa dingwaga tse di masome matlhano le bobedi, wa kgotla yoora Phitshane le wa dingwaga tse di masome matlhano le boferabobedi  wa Tloung. 

Supt Moshashane a re  yo o  gobetseng  ene o dingwaga  di masome mararo le bone, a re  le ene o tswa Tloung.  A re mo beseng batho ba le bararo ba ne ba alafelwa dikgobalo tse dipotlana ba bo ba gololwa ka lone letsatsi leo. 

O kopile bakgweetsi go kgweetsa ka kelotlhoko.  Ends