18 Aug 2013

Bagwebi ba dipalamo tsa setshaba ba kopilwe go dirisana sentle le morafe go fedisa dikgotlhang tse di kgoreletsang tsamaiso e ntle ya lefatshe leno.  

Mafoko a a builwe ke mothusa mookamedi wa lephata la ditsela, dipalamo le itshireletso, Mme Evise Joina, fa a bula dithuto-puisanyo tsa bagwebi ba dipalamo tsa setshaba kwa Palapye bosheng. O tlhalositse gore kgwebo ya dipalamo tsa setshaba e ka tswelela fa komiti e tshwaragane.

A re ba tshwanetse gape go tshwaragana le babereki ba puso, ba e leng bone badiragatsi ba melao jaaka ba lephata la dipalamo le mapodisi. Mme Joina a re fa tshwaragano eo e se yo, tiro ya bone ga e kitla e kgotsofatsa ka ba tlaa nna ba gotlhagotlhana mme tiro e kgoreletsege.  

Mogolwane wa mapodisi a ditsela kwa Palapye, Rre Robert Batsu, o ne a kopa beng ba dikgwebo tsa dipalamo tsa setshaba gore ba rute babereki ba bone gore ba emise go kgopakgopetsa setshaba fa ba se pegile. 

O ne a ba lemotsha gore dipalo tsa setshaba tsa go ikuela gore boradipalamo ga ba a ba tsaya sentle di ile magoletsa mme bangwe go bolelwa fa ba tlola melao mengwe e e ba tlamang.  O ne a fa sekai ka go gana go isa mopalami kwa lwapeng mme e le tshwanelo ya gore a isiwe teng, a bolela fa seo e le tlolo molao.

Rre Batsu o ne a tswelela a re bangwe babereki ba dipalamo tsa setshaba ba ipata ka gore ditsela mo mafelong mangwe ga di a siama mme go makatsa ka ba kgona go gana fela le go isa bapalami mo mafelong a a nang le ditsela tse di siameng jaaka kwa matlong a Botswana Housing Corporation mo Palapye.Bokhutlo