14 Aug 2013

Mmaboipelego wa kgotla ya Magapatona  kwa Tutume, Mme  Chawapa Liya a re kgaolo potlana ya  Tutume e na le bomme ba le 1 702 ba ba kwadisitsweng  lenaneo la  khansele fa  palo ya borre e le 199 mo  batlhoking ba  ba 1 901 ba ba  thusiwang ke  khansele.

Mme Liya o ne a bua mo dithuto-puisanong tsa  malatsi mabedi di rulagantswe ke bomme ba kgaolo eo le  maphata a a  farologaneng di lebagane le bomme fela kwa Tutume ka  Labobedi. Fa a  tshwaela tebang le tlhogo e e neng e re;  “bomme le  lehuma”, Mme  Liya o ne a  bolela fa  bomme ba  ameilwe ke lehuma thata. 

O ne a bolela fa seemo se se ngomola pelo, ka bomme  bangwe ba  adimile  tshwene  marapo ntswa go na le  mananeo a mantsi a ba ka ithusang go intsha mo diemong tse ba mo go tsone. O gwetlhile bomme go ema ka dinao go inaakanya le mananeo a puso a nyeletso  lehuma.

O kgadile bomme  bangwe ba ba  senyang nako ka ditshele, le dithamakgorwana tse di sa ba iseng gope. A  re gape ba  tswe  mo kgannye ya  gore “ke wa ntlo ya lehuma”. Mme Liya o ne  a  tlhalosa  fa  ofisi ya  boipelego e lebagane le go fetola matshelo  a batho go a baya mo  seemong se se  eletsegang e seng go  phakisa  batlhoki dijo  jaaka bangwe ba akanya.

Mongwe wa batsena dithuto Mme  Takungwa Anderson o ne a supa fa kitso e  tlhaela kwa bathong, a re gape ofisi ya  boipelego ga e rute batho ditiro tsa yone,  ke ka moo ba tsayang  gore kwa ofising eo go  thusiwa batlhoki go  bona dijo.

Mme  Anderson  a re bomme ba  nyoretswe go itirela mathata ke go tlhaela ba ba ka ba bontshang  lesedi le tsela gore ba kgone ditoro tsa bone. Bokhutlo