14 Aug 2013

Kgosi ya  Tati Town, Mme Ludo  Mosojane a re bomme bangwe ba sa ntse ba na le  mokgwa wa go loba dilo  dingwe tse di maswe tse di  ba diragalelang mo  botshelong jaaka  kgokgontsho mo  malwapeng.

Kgosi Mosojane o buile jalo  kwa thuto-puisanyong ya bomme ba kgaolo potlana ya Tutume e e neng e tshwaretswe kwa Tutume ka Mosupologo. Kgosi a re  bomme ba a kgokgontshiwa mme ga ba tswele kwa ntle go bua ka dikgwetlho tse ba  kopanang natso mo bathong  ba ba tshelang le bone.

O ba kopile go tswela tswaing ba abelane le babangwe dikgwetlho tse ba kopang natso gore ba kgone  go bona ditharabololo tsa tsone. O boletse gore go nna ka  botlhoko go borai ka felela go ama botsogo jwa motho.

O ne a tswelela a bolela fa  bomme e le batho ba ba nang  le talente le megopolo e me ntle le tebelopele, a re mmaba  mogolo mo go bone ke poifo  ya go supa bokgoni ja bone.

Kgosi Mosojane o ne a gwetlha bomme go ema ka dinao go thusana mo diemong tse di maswe le go supa kutlwelobotlhoko le  kemonokeng mo go ba ba  amegileng. O ile a galaletsa mmuso go  bo o eme bomme nokeng le  go rotloetsa tswelelopele ya  bone ka go dira  mananeo le melao e e ba sireletsang.

Mongwe wa dibui mooki  kwa kokelwaneng ya Thini  kwa Tutume, Mme Selebaleng Baoleki o boletse gore kgaolo potlana ya  Tutume e di feta tsotlhe lefatshe ka bophara ka palo ya batho ba ba amilweng ke megare ya malwetsi a tlhakanelo dikobo.

Mme Baoleki o ne a re seemo seo se supa fa batho ba  tlhakanela dikobo ba sa  itshireletse kana ba sa  direse sentle dikausu, a re  gape le tiriso ya melora e e tlhapang e na le ditlamorago bogolo jang mo go bomme.

O gakolotse bomme go  ipabalela ka nako tsotlhe. Maikaelelo a dithuto tseo e ne e le go rotloetsa bomme   le go abelana megopolo gape  e le go tlhagolela tsela  letsatsi la mafatshe-fatshe la  kgokgontsho ya bomme le  bana le le tlaa bong le  tshwaretswe mo kgaolong  ya Tutume kwa Nkange. Bokhutlo