15 Aug 2013

Maloko a komiti e e sireletsang le go lwantsha dikgwetlho tsa bana le setshaba ka kakaretso, ba kopilwe go netefatsa gore a bana ba  tshela sentle e bile ba sireletsegile ka dinako tsotlhe.

Mafoko a a builwe ke mmaboipelego wa khansele ya Tsabong, Mme Nametsegang Peloyame, kwa thuto puisanong e e neng e tshwerwe bosheng.

O ne a tlhalosa fa molao o o  sireletsang bana wa ngwaga wa 2009, o  tlhalosa gore ngwana mongwe le mongwe o tshwanelwa ke go itse batsadi ba gagwe botlhe le gore a utlwe bothito jwa lorato la bone le fa ba sa tlhole ba le mmogo.
 
O ne a tswelela ka go supa fa molao wa bana o tlama gore ngwana mongwe le mongwe o tshwanelwa ke go bona thuto, botsogo, bonno, go tlhokomelwa ka dijo le diaparo le tse dingwe, a supa gore go tlhoka go dira jalo ke go tsuolola ditshwanelo tsa bana e bile batsadi ba ba sa direng jalo ba  ka tseelwa dikgato tse di gagametseng. 

Mme Peloyame  o ne a tlhalosa le gore bana ba tshwanetse go akarediwa mo mererong ya selegae le go gakolola batsadi, go tsaya boikarabelo  ba sa le bannye ka e le bone babusi ba lefatshe leno ba ka moso.

Sergent Luci Toto wa sepodisi sa Tsabong,  o ne a bega gore go tswa mo dingwageng tse di fetileng go fitlhelela ka kgwedi ya Seetebosigo monongwaga, ba amogetse dikgetse di le masome a mabedi le borataro tsa go tlhakanela dikobo le bana ba ba kwa tlase ga dingwaga tse di lesome le borataro.

Mme Toto o ne a supa batsadi bangwe ba a reng ba gataka ditshwanelo tsa bana ka gantsi ba di loba fa tse dingwe ba felela ba tsholotse dikgetse tsa mofuta oo, ba lebile gore ba tlaa atswiwa ka sengwe, a supa fa go dira jalo go sa siama ka ngwana ene a felela ka go tshela ka botlhoko mo pelong ya gagwe botshelo jotlhe.

Mokwaledi mogolo wa lekgotla la ga mmakaseterata  kwa Tsabong, Rre Ditsaone Mogamisi, o ne a tlhalosa ka ditsamaiso le ditshekatsheko mabapi le dikgetse tsa dikotlo tsa bana fa go ikuetswe kwa lekgotleng leo.

Kwa bofelong jwa dithuto tse, ba komiti e e bopilweng ka maphata a puso a a dirisanang le bana,  e ne ya supa ba itlamile go leka ka bojotlhe go tlhomamisa gore a bana mo kgaolong ya Kgalagadi Borwa ba sereletsgile ka go ba lekola  nako le nako mo metseng e e farologanyeng. Bokhutlo