01 Aug 2013

Borre ba fera bongwe ba ba tlholegang kwa Thamaga, ba go bolelwang ba ne ba tlhasela Rre Tirelo Kgosipule kwa masimong a Dinkgwaneng mme ba mo gobatsa mo go masisi, ba tshwerwe ke mapodisi a Thamaga.

Babelaelwa ba ne ba iponatsa fa pele ga ga Mmakaseterata mogolo, Rre William Modise, kwa Molepolole bosheng. Sub-Inspector Mshingo Kedikanetswe, yo e leng mosekisi, o ne a kopa lekgotla gore le se ka la nama le kopile babelaelwa pele gore ba bue gore a ba ipona molato kgotsa nnyaa.

Motlhotlhomisi wa tiragalo e, Sub Inspector Christopher Disaitsanyeng, o tlhalositse fa e ne ya re kgwedi ya Phukwi e le malatsi a le lesome le boraro, borre bao ba gobatsa Rre Kgosipule ka go mo raga ka ditlhako kwa marekisetsong a bojalwa. O boleletse lekgotla gore ka nako ya molato o kwadisiwa kwa mapodising, mongongoregi o ne a idibetse.

Sub Inspector Disaitsanyeng a re mongongoregi o ne a isiwa kwa kokelong e kgolwane ya Thamaga mme morago a fetisediwa kwa go ya Princess Marina, kwa a robaditsweng teng kwa lekalaneng la ba ba gateletsweng ke bolwetse.

Inspector Disaitsanyeng o ne a tswelela a re mongongoregi o mo seemong se se kwa tlase. Mmakaseterata Modise o ne a tlhalosa fa a se na go letlelela ope wa babelaelwa go letela tsheko kwa ntle, a tlhalosa fa molao o bolela fa mongwe le mongwe yo e leng gore o a bo a le teng ka nako ya fa molato o dirwa mme a sa tsee kgato o tsewa jaaka modira molato.

O tsweletse a re molato o sa ntse o le mosha e bile ditlhotlhomiso di sa ntse di tsweletse, ka jalo fa ba ka gololwa, go ka kgoreletsa ditlhotlhomiso. Kgang e e tlaa tswelela gape ka kgwedi ya Phatwe e le malatsi a le lesome le bobedi kwa kgotla tshekelong ya Molepolole. BOKHUTLO