17 Jul 2013

Mookamedi wa mapodisi a Ramatlabama, Superintendent Tshegofatso Mokumakwa o ikuetse mo baruing go tlhokomela leruo la bone.

O boletse mo potsolosong gore go tshwerwe banna ba le bararo ba lefatshe la Aferika Borwa mabapi le dipodi tse go belaelwang e le tsa Batswana kwa motseng wa Litchtenbug.

A re borre bao ba sa ntse ba tshegeditswe ke mapodise a Lehuretshe gone kwa Afrika Borwa a tlatsa ka gore dipodi tseo di masome a supa le bongwe mme di akaretsa diphoko di le pedi.

O ne a tlhalosa gape gore go belaelwa fa dipodi tseo di ka tswa e le tsa barui ba metse ya Ramatlabama, Rakhuna, Tlhareseleele le Pitsane.

Superintendent Mokumakwa o laleditse barui ba metse eo go ikopanya le ba ofisi ya bone kwa Ramatlabama go tla go bona gore a leruo leo ga se la bone.

A re Batswana ba tlhokomele leruo la bone segolo thata dihutshane tse a tlhalositseng fa di bone mmaraka kwa Aferika Borwa a tlatsa ka gore podi e le nngwe fela teng e rekisiwa R3 000.

BOKHUTLO