17 Jul 2013

Mapodisi kwa Palapye a tshwere badiri ba e leng batswakwa ba le masome a matlhano le botlhano ka molato wa  go bereka ba se na diteseletso tsa go direla mo lefatsheng leno.

Mookamedi wa sepodisi sa Palapye, Superintendent Franken Mohutsiwa, o boletse gore mapodisi ba tshwere  babereki ba mafatshe a sele ba le masome a matlhano le botlhano, mo go bone go le badiri ba letso la India ba le masome a mane le bosupa, ba ba ferang bobedi e le ba mafatshe a mangwe a boagisani.

Superintendent Mohutsiwa o boletse fa ba ba tshwerweng ba ba masome a matlhano le botlhano, ba ne ba bereka mo komponeng ya WHBO, e e thapetsweng go tshwaraganya diphaephe tsa metsi go tswa kwa bokone go ya kwa borwa.

A re babeberiki bao, ba ne ba lefisiwa sekete sa dipula mongwe le mongwe, ba se na go ipona molato, a tlasa ka gore sepodisi se setse se dirile madi a a kana ka P39 200 mo melatong eo. O tlhalositse le gore ba sepodisi ba ne ba fetisetsa batshwarwa bao kwa lephateng la dipasa le mesepele.

Mo tiragalong e nngwe, mapodisi a tlhotlhomisa tiragalo e mo go yone batsamaya ka dinao ba le babedi ba neng ba tlhokafala ba se na go thulwa ke koloi kwa Dikabeya, gaufi le Palapye, ka kgwedi ya Phukwi e le supa.

Superintendent Mohutsiwa o tlhalosa gore mongwe wa baswi bao o ne a le dingwaga tse di masome a a supang le boraro, fa yo mongwe ene a ne a le dingwaga tse di masome a mabedi le borataro, mme go ne ga tlhomamisiwa fa ba tlhokafetse kwa kokelong ya Palapye.

O tlhalosa gore batsamaya ka dinao bao ba ne ba tlola tsela go tswa kwa botlhabatsatsi go ya kwa go ya kwa bophirimatsatsi, fa ba tlaa thulwa ke koloi ya modiro wa Toyota Hilux , e e neng e tswa kwa bokone, e ya kwa borwa.

A re mokgweetsi wa koloi eo, yo o dingwaga di masome a matlhano le boraro, ke moagi wa Palapye, kwa kgotleng ya Serorome.

A re mokgweetsi yoo o ne a iponatsa fa pele ga ga mmakaseterata mme o tlaa nama a tshegeditswe ke ba sepodisi go fitlhelela kgwedi eno e tlhola masome a mabedi le bone, fa a iponatsa gape kwa ga mmakaseterata.  BOKHUTLO