16 Jul 2013

Go tlhoka kitso ya go somarela bosupi fa go thubilwe mo dikgwebong go paledisa mapodisi go latedisa  magodu.

Moitseanape yo o tlhotlhomisang  kwa bosenyi bo diragetseng teng wa diofisi tsa sepodisi tsa Selebi Phikwe, Detective  Inspector  Agreement  Chuchu  o  tlhalositse fa bagwebi  ba  sa  itse  go  somarela  bosupi  jo bo ka dirang  gore  disenyi  di  kgone  go  latedisiswa.

Rre Chuchu a re mogwebi  ga a  a tshwanela  go tshwara  sepe  kgotsa go gata metlhala ya magodu fa a  fitlhela madirelo  a thubilwe, ka jalo  o  tshwanetse go begela  mapodisi  tiragalo eo ka  bofefo gore ba tle ba tsee bosupi  bo ise  bo  senyege.

A re bosupi jo ke jone bo dirisiwang ke mapodisi go latedisa disinyi. Rre Chuchu o tlhalositse fa mo  ditiragalong  ka  bontsi  bagwebi  ba  tshwara  fa go  sentsweng le go  gata  metlhala  ya  disenyi mme se se direle mapodisi  tiro thata  ka bosupi jo bo ka bong bo  tserwe  go  latedisa  disenyi  bo tlaabo bo senyegile.

Rre Chuchu a  re go bega ka bofefo le go tlhoka go tshwaratshwara go ka direla mapodisi tiro motlhofo ka menwana ya magodu le metlhala di ka tsewa ka boranyane mme di dirisiwe go a latedisa. A re sengwe le sengwe se se tlogetsweng ke magodu a sena go thuba se ka dirisiwa go a gokaganya le molato o ba o dirileng, ka jalo bagwebi ba tshwanetse go nna kelotlhoko mme ba seka ba sela sepe mo lefelong  le go thubilweng mo go lone.

Rre Chuchu o gakolotse beng ba dikgwebo go phakelela kwa dikgwebong tsa bone go netefatsa fa go sa thujwa mme fa go sentswe ba begele mapodisi ka bofefo gore bosupi bo tshwana motlhala bo tsewe bo ise bo senngwe ke phefo. BOKHUTLO