11 Jul 2013

Kgaolo ya Bobirwa e tlaa tshwara ditshupo tsa temo thuo go simolola kgwedi ya Phatwe e fera bongwe go fitlhela e le lesome le motso.

E ne ya re mo ngwageng o o fetileng ditshupo tsa se ka tswa tshwarwa ka gore kgaolo eo e ne e tlhasetswe ke leuba. Modulasetilo  wa  komiti  e e baakanyetsang ditshupo  tseo, Rre Monkemedi Dingalo, o tlhaloseditse ba lekalana la dikgangle go re mookamedi wa Botswana Development Coporation (BDC) , Rre Blackie Marole e tlaa nna molalediwa wa tlotla kwa ditshupong  tseo.

Rre Dingalo a re go baakanyetsa ditshupo tse go tsweletse sentle ka terata le dikago tsa lebala la ditshupodi setse di simolotswe go baakanngwa.

O tlhalositse gore ke nako ya gore dikomiti tse di rulaganyang go tshwarwa ga ditshupo, di simolole go kabakanya ditshupo gore di se ka tsa ikaega ka temothuo fela.

A re ditshupo tsa  Bobirwa di tlaa bo di sa remelela mo temothuong fela, ka a re ba solofetse disupiwa tsa ditiro tsa diatla, dikgwebo ka go farologana, dikompone tse di dirang dithoto tsa temo thuo ga mmogo le  leruo  le  tsa  dijwalo ka  go  farologana.

Are lekgotla la Motor Vehicle Accident Fund MVA) le thusa mo paakanyetsong ditshupo ka go rulaganya dikgaisano tsa mmabontle, pele ga ditshupo.

Rre  Dingalo  a re  ditshupo  tsa  kgaolo ya Bobirwa di itlamile go rotloetsa dikgwebo tsa banana,  ka  jalo a gakolola banana ba ba  nang le dikgwebo go tla  go  supa   dithoto   tsa  bone  kwa  ditshupong    tseo,  kwa  ba tlaa  kopanang le bareki  le go tsaya  botsipa  jwa go   tsamaisa dikgwebo  mo  bagwebing ba bangwe.

Rre Dingalo o kopile setshaba go tlisa disupiwa kwa ditshupong tse go ikopanya le komiti ya bone nako e sa ntse ele teng.

Balemi  le  barui  ba  kgaolo eo  ba atlile  mogopolo  wa go kabakanya disupiwa, b abo ba  kopa  komiti  e e  rulaganyetsang   ditshupo  go  nna  e tsaya  megopolo  mo setshabeng  gore ditshupo tsa kgaolo eo di se ka tsa kgorelediwa  ke leuba. BOKHUTLO