08 Jul 2013

Bagwebi ba toropo ya Lobatse ba kopilwe go nna kelotlhoko nako tsotlhe.

Go gakolotse jalo  Superintendent Peter Moloi wa mapodisi a  Woodhall e bile e le leloko la komiti ya bagwebi ya thibelo borukutlhi kwa letsatsing la ipapatso la bagwebi le rulagantswe ke  khansele ya Lobatse.

Superintendent Moloi o ne a gakolola bagwebi go banka madi nako tsotlhe go itsa bogodu, a tlatsa ka gore gantsi magodu ba a bo ba itse gore bomang ba na le madi mo toropong.

O gakolotse bagwebi go tlhomamisa gore bahiriwa ba bone ga se disinyi ka go  ikopanya le mapodisi go utlwa ka bone pele ga go ba thapa.

Superintendent Moloi o gwetlhile bagwebi go nna le di-alarm kana badisa dikago mo dikgwebong go fokotsa bogodu jo bo gomagometsang go diga dikgwebo ka bontsi.

O ne gape a kopa ba  dikgwebo tse di tona go tsenya dikapa ditshwantsho tsa CCTV mo madirelong go tlhofofatsa go tshwara magodu.

A re magodu mangwe a na le mokgwa wa go reka dilwana mo bagwebing ba dirisa dicheke le dikarata tsa banka, a tlhalosa fa dicheke tse dingwe go fitlhelwa di se na madi kwa bankeng.

O ne gape a tsibosa bagwebi ka madi a maitirelo a a anamang lefatshe ka bophara a re bagwebi ba reke metshine e e tlhatlhobang gore a madi ga se a maitirelo, a tlatsa ka gore bontsi jwa magodu bo dirisa madi ao mo dikgwebong tse di potlana ka ba itse gore ga di na didirisiwa tsa go nna jalo.

Superintendent Moloi o kopile bagwebi gore nako tsotlhe fa bareki ba tsena mo madirelong a bone ba kanoke bareki ba bone, a tlhalosa fa bangwe ba tsena mo madirelong ba tsile go kanoka gore ba ka utswa jang, a tlatsa ka gore fa ba belaela sengwe ba lome mapodisi tsebe ka batho ba go nna jalo.

Rre Moloi o wetse ka go gwetlha bagwebi go inaakanya le komiti ya thibelo borukutlhi mo dikgwebong e a tlhalositseng fa e ka thusa thata mo go lwantsheng burukutlhi. Bokhutlo