11 Jul 2017

Botlhoka tsebe jwa banana mo Molepolole go kaiwa e le jone bo gogang kwa tlhogong kgolo ya ditiro tsa borukutlhi.

Matshwenyego a, a ntshitswe mo tirong ya go tsibosa le go lekodisa morafe ka seemo sa borukutlhi mo Molepolole, kwa bofelong jwa mogwanto o o neng o rulagantswe ke mapodisi.

Thulaganyo e, e gwetlhilwe ke matshwenyego a mapodisi ka kgolo ya borukutlhi jo bo rwelweng kwa tlhogong ke banana, jo go kaiwang bo fetotse Molepolole Sotoma le Gomora.

Mookamedi wa mapodisi a Molepolole, Officer Commanding District Number 11, Senior Superintendent Modise Gabatshwane a re o ipotsa gore a motse wa Molepolole o tlaa thusa go nna tshaba e e nang le boikarabelo fa botsadi bo sa ntse bo ikgatholositse masula a go nna jalo.

Rre Modise a re o ipotsa gore botsadi bo bokgakala bokae fa borukutli jo bo amang banana se tsweletse jaana.

A re le fa mapodisi a ka tswa a dira maiteko, ga go sepe se ba ka se dirang fa tshwaragano e santse e tlhaela.

Rre Gabatshwane a re ke boikarabelo jwa morafe go ikagela motse ba emise go supa mapodisi ka monwana.

Mogolwane wa ba dikgolegelo mo Molepolole, Senior Superintendent Ookeditse Mpeu, a re kgolegelo ya Molepolole ke lengwe la makalana a angwang ke botlhokatsebe jwa banana. 

A re mangwe a masula a ba a itemogelang ke a basetsanyana ba ba okisang magolegwa a borre, ba ba direlang mo tshimong ya lekalana leo.

Ntlha e nngwe e mogolwane yoo a e tlhagisitseng, ke ya go neela magolegwa ditagi fa ba ile kwa makgotleng a ditsheko, di tshwana le motokwane go tsena ka tsone mo kgolegelong, mo go felelang go baka dintwa le dipolaano tsa magolegwa.

Rre Mpeu a re ditiragalo tse, di rotloediwa ke go tlhoka kgalemo ga botsadi ka go ipaya moriti o tsididi go ikgatholosa masula a bana.

Ka jalo o rotloeditse botsadi go betla megopolo e e ka salwang morago go ya pele, go bona ka fa masula ao a ka tsibogelwang ka teng go busetsa serodumo sa Molepolole.

Mmabontlenyane wa Miss Heritage, Mme Kgomotso Ntsima, yo e neng e le sebui sa tlotla, o ikuetse mo bananeng go fetola maitsholo go betla bokamoso jwa bone le go le re kagiso le thitibalo mo Mokwena. 

“Maiteko a ka tswelela a dirwa go lere bogakolodi ka ditsela tse di farologanyeng mme fa lona banana lo ikgethela go swabisa batsadi ba lona le one molao, lo tlaa roba se lo se jwetseng,” go bua jalo Mme Ntsima. 

Dipalo tse di neng tsa rolelwa morafe o o neng o thologetse tiro eo, di supa fa seemo sa borukutlhi mo motseng se befile, ka jalo ba kopa tshwaragano ya ba-na-le seabe go betla methale ya go lwantsha bo-tlhoka tsebe. Bokhutlo