12 Jul 2017

Barutabana le bagokgo ya dikole tse dipotlana le tse dikgololwane ba ba tlogetseng tiro ka bogodi ba ne ba kopane mo Palapye ka Labone go lekodisana ka tse di amanang le lekgotla la bone la Botswana Teachers Union (BTU) e le lantlha mo ditsong.

Boitumelo e ne e le jo bo sa laolesegeng fa barutabana ba bonana le bakaulengwe ba ba sa bolong go kgaogana le bone morago ga go tlogela tiro.

Phuthegoo eo e ne e rulagantswe ke ba lekalana la More Power Investment (MPI) ka maikaelelo a go abelana le beng ba lekgotla ka tse di fetotsweng go tokafatsa le go godisa BTU.

Mo pegong ya bone ba ne ba itebaganya le dintlha di le tharo ebong  lekalana la dipeeletso tsa madi a diphitlho, dithoto le bonno, ntlha e nngwe e ne ya nna ya lekalana le diphitlho fa ya boraro e ne e le go ba lekodisa ka BTU.

E rile a lekodisa ka MPI, mogolwane wa lekalana leo Rre Ronald Keatshabe a supa fa e le lekalana la tsa dipeeletso le lebaganye le tsa kgwebo ka fa tlase ga lekgotla la BTU, le simolotswe ka 2012.

Rre Keatshabe o ne a supa fa diofisi tsa lekalana leo di le mo mafelong a supa, ebong Kanye, Kang,Maun,Francistown,Palapye,  Gumare le Gaborone, a tlhalosa fa ba dirile seo ka maikaelelo a go atumetsa maloko ditirelo. O ne a gatelela mosola wa lekalana leo a re le eteletswe pele ke lekgotla la bomankge ba dikisto tsa semolao le tiriso ya madi.

O ne a thethebatsa bagolo dipelo ka go tlhalosa fa lekalana leo le tsamaisiwa e bile le kwadisitswe ka fa molaong, ka melawana ya tlhokomelo le tiriso ya madi ya NBIFIRA mme gape ba le ka fa tlase ga lekalana le tlhokomelo madi a dipeeletso, dithoto le diphitlho (insurences).

O ne a kopa maloko go rurifatsa boloko e sere gongwe ba iphithela ba le mo mathateng ka nako e ba tlhokang thuso, segolo jang ka nako ya dintsho.

Modulasetilo wa tBotswana Teachers Union Funeral Funds (BOTUFF) Mme Gasethokwe Phirinyane ene o ne a tlhalosa fa maikaelelo e le go fa barutabana ba ba tlogetseng tiro seriti se se ba tshwanetseng ka nako ya fa ba fuduga mo lefatshing le le ka kwano. Mme Phirinyane a re go le gantsi barutabana ba ba tlogetseng tiro le badirelapuso ba bangwe fa go tla nako ya gore ba ikhutse ba robale ka leso, e nna matlhotlhapelo a a supang botlhoki jwa motho go sa kgathalesege gore e rile a le mo botshelong a direla lefatshe ka go ntsha bomankge  ba dikitso, ba lefatshe le ipelafatsang ka bone. Maloko a ne a tlhalosediwa gore ba ka duela P45, mme ba fitlhwa ka P25 000, kana ba oketse dituelo tsa kgwedi le kgwedi go bolokwa ka P60 000. Go na le lekalana la dithoto le le lebaganyeng le tsa matlo, dithoto, dikoloi le dipe fela tsa tlhwatlhwa e kgolo.

Mothusa mookamela lekgotla la BTU, Rre Gotlamang Oitsile o ne a kopa maloko go tla ka megopolo e e ka tlhabololang lekgotla mme a supa fa mananeo otlhe a a nankotsweng a diretswe go ba tokafaletsa matshelo.

A re go mo go bone go tswa ka mananeo a e ka reng ba tlogetse tiro jaana a ba tokafaletsa matshelo, a re ba leka go tla ka methale e ba ka buisanang le puso ka yone go lemoga botlhokwa jwa barutabana ba ba tlogetseng ditiro fela jaaka go dirwa mo makalaneng a mangwe.

O ne a supa fa BTU e lebanwe ke dikgwetlho  tsa go ntsha barutabana badiredi ba ba faphegileng, a re seo ke go ba tswala melomo le go ba itsa go bua ka ditshwanelo tsa bone. O ne a ba lekodisa ka ipelelo dingwaga tse di masome a fera bobedi  lekgtola la BTU le ntse le le teng, a re ba ipaakanyetse moletlo oo.

E ne ya re ba akgela barutabana ba supa fa ba diretse lefatshe leno ka jalo ba tlhokana le go lemogwa ka dinako tsotlhe, fa bangwe ba ne ba re go na le tlhakatlhakano ya gore makgotla a babereki jaanong a fetogile a sepolotiki.

Ba re jaanong e nne selo modiro go lalediwa go baakanya  le go aga lekgotla. Ba ne ba kopa gore ba neelwe dikgang tse di amang lekgotla nako le nako, le gore go rurifadiwe go nna le seabe ga bone mo ditsamaisong tsa lekgotla.

Ba ne gape ba re ka barutabana ba ba tlogetseng tiro ba le tlhaga ba thapiwe go thusa mo go tsa thuto, ba supa fa serodumo sa thuto se wetse tlase ka bontsi jwa barutabana e le banana ba ba rileng ba laolwa ke nnotagi. Bokhutlo