11 Jul 2017

Mogwebi yo mmotlana, Rre Barulaganye Kethusang o dumela gore mongwe le mongwe o ka nna le seabe mo go tlhameng ditiro, bogolo jang fa motho a na le lorato le maikaelelo mo go se a se dirang.

Rre Kethusang a re jaaka monana yo o sa yang kgakala mo dithutong tsa sekole, lorato, kgatlhego le bokgoni  jwa petlo ke tsone di mo gwetlhileng  gore ka 2007 puso e mo ise  sekoleng sa go betla kwa Sehunou go  ya go anywa  botsipa jo bontsi  jwa go betla. 

Mo potsolotsong le BOPA bosheng,  o ne a re thuto ga e sa tlhole e le ya  go bereka mo diofising fela, mme thuto ya ditiro tsa diatla e botlhokwa mo bogompienong ka go sena ditiro. 

Monana yo o dingwaga  tse 25 o sale a rata go betla a le mmotlana, mpho e lelwapa la bone le segofaditsweng ka yone, ba betla dilwana tsa setso jaaka dipora, dikika, dintsho le tse dingwe. 

O dirisa setlhare sa mokongwa, se se bonwang thata kwa kgotleng ya Makolojane go betla dilwana tse. 

Rre Kethusang a re tse a di betlang o kgona go di rekisetsa batho ka go farorologana gore a inamole mo lehumeng.

A re puso ka nosi e ka seke e kgone go re tlhamela mebereko, ka jalo a rotloetsa banana le bagolo go ikemela ka dinao gore ba kgone go ikogola  mo isong.

Rre Kethusang a re ka Setswana se re tlhako ya morago e gata fa ya pele e gatileng gone, o dirisitse monyetla wa gore le ene a gate mo dikgatong tsa ba lelwapa la gagwe.

O  betlela mo lwapeng ka a ka seke a kgone madi a go direla dilwana tsa gagwe kwa madirelong a a hirisiwang mme a di rwale a tsamaye a di bapatsa mo bathong.

Monana yo a re o itumedisiwa ke gore Batswana ba santse ba rata dilwana  tse a di dirang ka e bile e le tsa setso le ntswa bontsi bo dirisa dilwana tsa segompieno,   a supa fa dintshwana e le tsone tse di rekwang thata. 

Monana yo a re o kopana le kgwetlho ya gore Batswana ba batla dilo tsa gagwe ka tlhwatlhwa e e kwa tlase mme se se felele se dira gore a seka a bona madi a melora.

“Keletso ke gore goromente a nthuse ka motshine o o betlang gore ke tle ke kgone go direla Batswana bontle jo bo feteletseng.” Bokhutlo