29 Jun 2017

Go ole mokala gareng ga mekala
Tlhare setona se kutumile ,kutumisa lehatshe ;Ketumile
Tumo ya sone e utlwetse gareng go pelo tsa ditshaba
Go ole mokala
Go ole mokala gareng ga mekala

Mokala mogolo thoteng tsa ga Ngwatjetse ,go ole mokala
Thito ya one pinagare ya setshaba
Go ole mokala
Go ole mokala gareng ga mekala

Mokala mogolo,kala tsa one di kalapa kgakala
Kgakala kgakala go mawatle
Go ole mokala

Go ole mokala gareng ga mekala
Kala tsa one tshireletsa dichaba;Masire
Masire masira pelo tsa baba go tlhasela

Go ole mokala
Go ole mokala gareng ga mekala
Masire masireletsa kagiso
Masire madibela tshaba
Go ole mokala

Go ole mokala gareng ga mekala
Motho wa ga Tjetumile a Joni a Khwete a Masire
Motebejana a mmina phiri thamagana gareng go dikwena
E khukhwa e mangole a ditshipi

Mokala wa go kuiwa mokgosi theba kagiso
Go ole mokala
Go ole mokala gareng ga mekala
 Go ole mokala mogolo ,theba kagiso

Mokala mogolo ,medi ya one e ikadile le lefatshe
Mokala mogolo le bo Lesotho ba setse ba o itse
Ka ba setse ba orile magala a one
Bothitho jwa ‘iso la kagiso Masire mosireletsa ditshaba

Go ole mokala
Go ole mokala gareng ga mekala
Tau ga ya lala e robetse
Batswana ga re a latlhegelwa re latlhegile
Namane e tona re tlaa dula re go gopotse

Namane e tona sellong re tlaa thubagana ka setshego
Sellong re tlaa go gopola metlaeng
Sellong re tlaa go gopola dinyaong
Robala ka kagiso motebejana

Robala ka kagiso mmina phiri
Roballwa ke ditlhokwa mokala oora-Masire

(Leboko ka: Tiroyaone Ramooki)