22 Jun 2017

Mogwebi mmotlana wa didirisiwa tsa motlakase, Rre Morgan Tebatso o gwetlhile  Batswana go dira ka nata go tlhama ditiro gore ba kgone go itshetsa ka puso ka esi e ka se thape batho botlhe.

Mo potsolosong bosheng, mogwebi yo wa Serowe, o ne a tlhalosa fa  a simolotse kgwebo ka 2010 mme a itebagantse le go baakanya diketlele, dikgatiso le ditofo tsa motlakase, a re gape o tsenya dielemente mo diketleleng le mo diemereng.

Mogwebi yo, e ne ya re ka 2006 a kopana le rre mongwe mo khamphaning ya motlakase kwa Mahalapye e le mogolwane wa gagwe, e ne e re fa ba tshaisetse ba ye kwa lwapeng lwa rre yo  ba ye go baakanya diketlele, e le gone jaaka a anywa   botsipa.

Rre Tebatso a re ka go lemoga fa a anyilwe botsipa a bona go tshwanela go ipulela madirelo.

A re o ne  a tsamaya mo metseng a kopa diketlele tse di senyegileng mme a di tlhabolole a bo  a di rekisa.

A re kgwetlho ya gagwe ke go tlhoka lefelo le a direlang mo go lone, jaanong go mo patika gore a tsamae mo motseng go ipapatsa.

O ne a tlhalosa gore ntswa a sa dire madi a a kalo, o tshwanelwa ke go reka dielemente ka tsone dipoelo tsa gagwe, a supa gore fa e ne e se gone o ka bo a direla Batswana bontle jo bo fetang jwa a bo dirang.

Mogwebi yo a re  fa nne dingwaga di mo letla o kabo a ya go tsaa lenaneo la banana ka a bona banana ba ithetse moriti o tsididi ba sa inaakanye le mananeo a ba a diretsweng go itlhabolola.

Rre Tebatso a re o dirisa se e le bopaki mo botshelong jwa gagwe ka a kgonne go dira kgwebo kwa  ntle ga dithuso dipe tsa mananeo a puso mme o kgonne go nyala ka dipoelo tsa gagwe.

A re gape le bana ba gagwe ga ba lale  ka tlala, o kgona le gone go ba tsenya dikole.

O bile a rotloetsa Batswana gore mo botshelong ba seka ba tlhopa ditiro, segolo bogolo tsa diatla.

A re ba tshwanetse go inaakanya le ditiro tsa diatla ka gore di ka ba isa golo gongwe mo botshelong.

A re tiro ya diatla e tlhoka lorato le bopelotelele.

A re keletso ya gagwe ke gore goromente a sekaseke mananeo a a ka solegelang bagolo molemo, a re se se ka ba thusa go tlhama ditiro tse di ka hirang banana. BOPA