20 Jun 2017

Morago ga go tswalwa ga moepo wa BCL kwa Selebi Phikwe, Mme Neo Lejahe wa dingwaga tse di masome mararo le borataro a simolola kgwebo ya go rua mebutla.

Mme Lejahe a re lorato lwa gagwe mo thuong ya mebutla lo sale lo simologile a santse a tsena sekole se segolwane kwa Moiyabana.A re go tswalwa ga moepo mo go ileng ga tlogela itsholelo e wetse tlase kwa toropong eo, go ile ga nna le seabe mo kwelong tlase ga kgwebo ya gagwe ya go rekisa diaparo, mme ka go twe gagabo motho go thebe-phatshwa, a boela gae kwa Serowe.

Mme Lejahe a re e ne ya re go ikgakologelwa a reka mebutla e le mebedi, e a neng a e baya kwa morakeng kwa Themashanga.

O supile fa go fudugeleng Serowe ga gagwe ngogola ka Sedimonthole, a ne a tsaya mebutla e jaanong e neng e setse e oketsegile ka palo e supa, maikaelelo e le go godisa kgwebo.

Mme Lejahe yo o setseng a na le sephatlo sa ngwaga a ntse a nna mo Serowe, a re le fa a ise a simolole go rekisa mebutla ka a santse a batla e ntsifala, bangwe ba setse ba supa kgatlhego mo go yone mme se, se mo tiisa moko.

Mo nakong ya gompieno Mme Lejahe o na le mebutla e le lesome le bongwe, mme a supa fa e ka bo e feta fa, fa e ne e se ka dipula tse di neleng tse di neng tsa bolaya e le lesome le bone.

A  re mebutla e ja kgapetsakgapetsa e bile ga e batle modumo o montsi ka e tshabelelwa ke letshogo le le kgonang go e idibatsa.

A re o na le maikaelelo a go tsenelela ditshupo tsa temo-thuo go ya go supa mebutla.
 

O supile fa a emetse phetolo go tswa kwa go ba kabo ditsha go atolosa lolwapa lwa gagwe gore fa a ruetseng teng go tle go bonale.  BOPA