14 Jun 2017

Letlhoko la kgosi kwa Tsetseng mo kgaolong potlana ya Letlhakeng go tlhalosiwa fa le babaletse banni ka jaana le emisitse ditirelo dingwe tsa botlhokwa.

Motse oo o setse o sena kgosi morago ga go latlhela ga ga Kgosi Matausu Gaothusi ngogola ka ntlha ya bogodi.

E rile a bua mo potsolotsong bosheng, kgosana wa kgotla ya Molehele, Rre Kebabaletswe Katlholo o ne a supa fa ditirelo tse di tshwanang le go sekisa di amegile mme jaanong ditsheko di setse di le mokowa.

O supile gape fa jaanong bone e le dikgosana ba setse ba tlamega go saena ditlankana tsa manyalo ntateng ya letlhoko la kgosi, selo se a kaileng se sa siama ka maemo a bone a sa ba letle go dira ditiro tseo tse di lebaneng kgosi ka ba kgona go felela ba tsene mo mathateng.

Moemela kgosi wa Bakwena mo kgaolong potlana ya Letlhakeng, Kgosi Itsoseng Gaoonwe o ne a tlhalosa fa go bewa ga kgosi wa Tsetseng go le mo diatleng tsa morafe.

O ne a tlhalosa fa morafe o santse o gogagona ka gore ke mang yo o tshwanetseng go tlhatlhama Kgosi Gaothusi, mme a supa fa a santse a eme ka bone go mo fa leina go le fetisetsa kwa go Kgosi Kgari III jaaka e le tsamaiso.

Mo go tse dingwe, Rre Katlholo o supile fa motse wa bone o saletse morago fa o tshwantshanngwa le e mengwe ya selebego sa one fa go tla mo ditlhabololong jaaka letlhoko la motlakase o a reng ga ba bolo go lela ka one mme go se nko e tswang lemina.

A re letlhoko la motlakase le folodisa go gola ga dikgwebo, e bile go tshabisa bagwebi ba basha go tla go dira dikgwebo koo.

Rre Kgatlholo a re se se feletsa se ama tlhamo ya mebereko mo motseng wa bone mme se se dire gore banana ba felele ba gobeya le motse ba tlhoka fa ba tsenyang diatla teng.

A re se se dira gore banana ba felele ba raelesega go dira borukutlhi.

Rre Katlholo o ne gape a itela ka letlhoko la mokenti, a re fa go tla mo dinakong tsa go rekisa leruo ga go na yo o ba fang teseletso ya go tlodisetsa dikgomo kwa mmarakeng kwa motseng wa Kang o o leng mo kgaolong ya Kgalagadi ntswa e le o ne o gaufi le bone.

 A re letlhoko la mokenti gape le sokodisa barui ka jaana ba sena yo o ba thusang ka melemo.

E rile a ntsha la gagwe, modulasetilo wa ditlhabololo tsa motse, Rre Action Maphale a supa fa letlhoko la mokgweetsi wa koloi ya kokelwana le baya balwetsi ka fa mosing ka ba patelesega go adima bakgweetsi ba maphata a mangwe kana ba dirisa dikoloi tsa bone.

O ne gape a tlhalosa fa mo mading a a neng a abelwa dikgaolo ba ne ba ikgethela go dira motse wa setso  o o ka rutang bana le bajanala ka ditso le dilo tse di neng di diragala bogologolo, mme a kaya fa jaanong ba le  gare ga naka tsa nare ka ba sa itse gore madi a, a ya go tswa leng ka go sena yo o ba fang tlhaloso. BOKHUTLO